Sátbaev qalasynda mas jolaýshy kólikti toqtatqan jol polıtseıine judyryq ala júgirdi
QARAǴANDY. 4 sáýir. QazAqparat - Qaraǵandy oblysynyń Sátbaev qalasynda mas jolaýshy kólikti toqtatqan jol polıtseıne shabýyl jasady. Bul týraly oblystyq ІІD-niń baspasóz qyzmetinen habarlaıdy.
«Sátbaev qalasyndaǵy kólik stansasynyń qasynda jol polıtsııasynyń jasaǵy júrgizýshisi qaýipsizdik beldigin salmaǵan «Honda-Odısseı» kóligin toqtatty. Salondaǵy júrgizýshiniń aǵasy bolyp shyqqan 37 jastaǵy mas er adam polıtsııa qyzmetkerine judyryq ala júgirip, birneshe ret uryp úlgergen», - dep málimdedi oqıǵa týraly oblystyq ІІD-niń baspasóz qyzmetinen.
Dárigerler jol polıtseıiniń ıyǵy men qolynyń jaraqattanǵanyn anyqtady. Al jábirleýshiniń alkogoldik mas kúıinde bolǵany dáleldendi.
«Júrgizýshi ákimshilik quqyq buzýshylyǵy úshin jaýapkershilikke tartylady. Bılik ókiline zorlyq kórsetý faktisimen jolaýshyǵa baılanysty protsessýaldyq sheshim qabyldanady», - dep habarlady oblystyq ІІD-niń baspasóz qyzmetinen.
