Sátbaev qalasynda makaron ónimderiniń 10 túri óndiriledi
ASTANA. QazAqparat - Sátbaevtaǵy makaron tsehyna qyrkúıek aıynda bir jyl tolady. Jas kásiporyn otandyq naryqta óziniń «Haným» markasyn tanytyp úlgerdi. Jyl saıyn ótkiziletin «Qazaqstannyń úzdik taýary» baıqaý-kórmesiniń oblystyq kezeńinde tseh «Úzdik azyq-túlik taýarlary» atalymy boıynsha 18 úmitkerdiń ishinde jeńimpazdardyń biri atandy, dep habarlaıdy oblystyq ákimdiktiń baspasóz qyzmeti.
Sonymen qatar bul nomınatsııada temirtaýlyq «REN-MILK» JShS jáne Buqar jyraý aýdanyndaǵy «Qaraǵandy qus» JShS úzdik dep tanyldy.
«Haným» Jaǵyparova M.K. JK» makaron ónimderin shyǵaratyn óndiristik ónerkásibi zamanaýı qurylǵylarmen jabdyqtalǵan. Munda qysqa kesilgen makaron ónimderi men jaıma shyǵaratyn joǵarytehnologııalyq eki jeli jumys isteıdi. Búginde makaron ónimderiniń 10 túrin óndiredi. Bolashaqta ónim túrlerin kóbeıtý kózdelgen. Óndiris qýattylyǵy jylyna - 3000 tonna.
«Undy biz Óskemennen alamyz. Aldaǵy jyldary ózimizdiń dıirmenimiz ben un tartý tsehymyzdy ashqymyz keledi. Qazir ónimderimizdi Sátpaev, Jezqazǵan qalalary men Ulytaý aýdanynyń turǵyndary tutynady. Elimiz boıynsha taralýy úshin eńbek etetin bolamyz, - deıdi kásipker Merýert Jaǵyparova. - Biz óz isimizdi damytyp jatyrmyz jáne el ekonomıkasynyń órkendeýine óz úlesimizdi qosamyz dep oılaımyn».
Makaron tsehynda 5 adam jumys isteıdi. Eńbekkerler jańa tehnologııalardy meńgerý úshin oqý kýrstarynan ótkiziledi.
Kásiporyn qazir Astana qalasynda ótetin baıqaýǵa qyzý daıyndyq ústinde.
