Sátbaev qalasynda «Qazaqmys» kenishinde joldyń bir bóligi opyryldy
QARAǴANDY. QazAqparat - Jezqazǵan mańynda ornalasqan Sátbaev qalasynda joldyń bir bóligi opyrylyp tústi, dep habarlaıdy «QazAqparat» HAA tilshisi.
Tótenshe jaǵdaı ornynda túsirilgen vıdeolar áleýmettik jelige tarady. Bul joldyń «Qazaqmys» korporatsııasynyń eki kenishin jalǵap turǵany anyqtaldy. Qaraǵandy oblysy ákimdiginiń baspasóz qyzmeti TJ qatysty pikir bildirdi.
«15 aqpan kúni Kresto-Tsentr kareri aýmaǵynda josparly taý jumystaryn júrgizý barysynda qara jol bóligi 5-10 metr tereńdikke deıin opyryldy. Joldyń bul bóligi 1996 jyldan beri qoldanylmaıdy», - dep habarlady Qaraǵandy oblysy ákimdiginiń baspasóz qyzmeti.
"Bul aýmaqta Shyǵys-Jezqazǵan kenishiniń óndiristik alańy bar jáne munyń turǵyn kentterge jaqyn aýmaqtarǵa qatysy joq. Qulaǵan jol bóligi men eń jaqyn aýyl arasy bir shaqyrymnan asady".
Joldyń opyrylýynan mert bolǵandar nemese zardap shekkender joq. Korporatsııa qyzmetkerleri oıylǵan jerdi qorshaýǵa aldy jáne qalpyna keltirý jumystaryn bastaýǵa nıetti.
