Sátbaev qalasynda kásipkerlerge qansha grant berildi
Dáýlet Seıtpekov – Sátbaevtyń ortalyǵynda ornalasqan Aqboken dızaın-stýdııasynyń ıesi. 2020 jyly ol qala ákiminiń 600 myń teńge kólemindegi grantyn jeńip alyp, sonyń arqasynda stýdııaǵa tehnıka satyp aldy.
«Polıgrafııany ashý ıdeıasy eki jyl buryn men kýrer bolyp jumys istegen kezimde paıda boldy. Maǵan túrli gramotalar, alǵys hattar, býkletter, plakattar, bannerler tasymaldaýǵa týra keldi. Sodan keıin men olardyń kópshiligi shablonmen jasalǵanyna nemese mátinderde qateler bar ekenine nazar aýdardym. Osy naryqty zertteı kele, men polıgrafııalyq ónim assortımentin túrlendirip, adamdarǵa saýatty polıgrafııalyq buıymdardy basyp shyǵarýǵa kómektesý úshin jeke stýdııa ashýdy uıǵardym. Qazir bizdiń ónim suranysqa ıe. Daıyn materıaldardy basyp shyǵarýdan basqa, biz mátindi túzetý qyzmetterin usynamyz», – dep bólisti Dáýlet Seıitpekov.
Kezdesýde basqa da grant ıegerleri jobalaryn tanystyrdy. Olar qatysýshylarǵa óz bıznesin qalaı qurý kerektigin aıtyp berdi.
«Bıznes jasqa qaramaıdy. Adam neǵurlym jas bolsa, onyń tabysty bolý múmkindigi de soǵurlym joǵary bolady. Qazir jańa tehnologııalardyń, ómir men qyzmettiń barlyq salasynda qarqyndy ózgeristerdiń kezeńi. Biz sizderden kreatıvti ıdeıalar, keleshegi zor usynystar men batyl sheshimder kútemiz», – dep atap ótti qala ákimi Asqar Ydyrysov.
Sátbaev qalasynda jyl saıyn jastar kásipkerligin damytýǵa bólinetin granttardyń sany men jalpy somasy ósip keledi. 2019 jyly 6 grant, 2020 jyly – 9 jáne 2021 jyly 23 grant berildi.
Jastardyń kásipkerlik áleýetin damytýǵa 2019 jyldan beri jumys istep kele jatqan jeksenbilik bıznes mektebi yqpal etedi. Sabaqtardyń arqasynda tyńdaýshylar qarjylyq saýattylyq negizderin jáne bıznes júrgizýdiń zamanaýı quraldaryn úırenedi.
