Sátbaev qalasynda alǵashqy jekemenshik balabaqsha ashyldy
QARAǴANDY. QazAqparat - Sátbaev qalasynda memlekettik jáne jekemenshik áriptestik aıasynda alǵash ret jańa balabaqsha ashyldy. Paıdalanýǵa berilgen mektepke deıingi mekemede 50 bala tárbıelenedi, dep habarlaıdy QazAqparat tilshisi.
«Aıbol» balabaqshasy burynǵy kásiporyn ǵımaratynda ornalasqan. Eki qabattan turatyn nysan tolyqtaı kúrdeli jóndeýden ótken. Munda barlyǵy balalar úshin egjeı-tegjeıli oılastyrylǵan.
Mektepke deıingi ortalyq memlekettik talapqa saı jabdyqtalǵan. Munda 1-5 jas aralyǵyndaǵy búldirshinder úsh tilde bazalyq bilim alyp, shyǵarmashylyǵyn shyńdaı alady. Mekemede psıholog, logoped mamandarymen birge dárigerler de jumys isteıdi.
Jańa nysanda ata-analar úshin aı saıynǵy tólemaqy memlekettik balabaqshadaǵydaı - 12 000 teńgeni quraıdy. Qalǵan soma memlekettik tapsyrys kólemin ulǵaıtý arqyly jergilikti bıýdjetten tólenip otyrady.
«Qala boıynsha mektepke deıingi ortalyqtar 1-6 jas aralyǵyndaǵy balalardyń 98% qamtyp otyr. Qalamyzda mundaı balabaqsha alǵash ret ashylǵanymen, bul sońy emes. Aldaǵy ýaqytta taǵy 2 jobany usynamyz. Osy baǵyttaǵy jumystar jalǵasyn taýyp, qalamyzdyń kishkentaı turǵyndaryn 100% qamtamasyz etemiz degen senimdemin», - dedi Sátpaev qalasynyń ákimi Asqar Ydyrysov.
Osylaısha, Sátbaev qalasynda bolashaqta taǵy eki jekemenshik balabaqsha ashylady dep josparlanýda.
Qazir qalada 1-den 6 jasqa deıingi balalardyń 98% mektepke deıingi mekemege baryp júr.
