Sátbaev eldi mekenderinde úıleri opyrylǵan turǵyndarǵa arnap bes qabatty 25 turǵyn úı salynady
ASTANA. QazAqparat - Sátbaevta mys ken oryndaryn qaıta óńdeý barysynda opyrylyp túsken aýmaqtardyń turǵyndaryn kóshirýge arnalǵan turǵyn úılerdiń qurylysy jalǵasýda. Bul týraly Qaraǵandy oblysynyń ákimi Nurmuhambet Ábdibekov halyqpen esep berý kezdesýinde málim etti, dep habarlaıdy ákimdiktiń baspasóz qyzmeti.
Turǵyndardy kóshirý Jezqazǵan aımaǵyn áleýmettik-ekonomıkalyq damytýdyń keshendi jospary aıasynda júrgiziledi.
«Búginde 859 otbasyn baspanamen qamtý úshin 39 turǵyn úı salynyp, 6 páter satyp alyndy. Sondaı-aq, 1150 otbasyǵa arnalǵan jalpy aýdany 78 myń sharshy metrlik bes qabatty 25 turǵyn úıdiń qurylysy jyl sońyna deıin aıaqtalmaq», - dedi aımaq basshysy.
Jalpy, oblys boıynsha 2017 jyly jalpy aýdany 304 myń sharshy metrdi quraıtyn jańa úıler salý kózdelgen.
«QR Úkimetimen «Nurly jer» turǵyn úı qurylysy boıynsha jańa baǵdarlama bekitildi. Onda «Nurly jol» jáne Óńirlerdi damytý baǵdarlamalary aıasynda qarastyrylǵan turǵyn úı qurylysy biriktirilgen», - dedi oblys ákimi.
Oblysta «Nurly jer» baǵdarlamasyn iske asyrý úshin 1,5 mlrd. teńge bólindi. 19 myń sharshy metr baspana salý josparlanǵan. Kezekte turǵan 336 adam turǵyn úımen qamtamasyz etilmek.
«Turǵyn úı qurylys jınaq banki» AQ salymshylary, sonyń ishinde jergilikti atqarýshy organdarda kezekte turǵandar úshin kredıttik turǵyn úı qurylysy jalǵasady. Búginde mundaı baspana salýdyń 11 jobasy bar», - dedi Nurmuhambet Ábdibekov.
