Sátbaev atyndaǵy sý arnasynda iri órt boldy
EKІBASTUZ. QazAqparat – Sátbaev atyndaǵy sý arnasyndaǵy iri órt saldarynan sorǵy stantsııasy 270 mln teńge shyǵynǵa ushyrady. №2,3,4,5 sorǵy stantsııasynyń qyzmeti toqtatyldy, dep habarlaıdy QazAqparat Pavlodarnews.kz-ke silteme jasap.
Oblystyq TJD baspasóz qyzmetiniń málimetinshe, aǵymdaǵy jyldyń 29 tamyzynda «Sátbaev sý arnasy» ShJQ RMK fılıalynyń №2 sorǵy stantsııasynda órt shyqqany týraly habarlama túsken. Sorǵy Ekibastuz qalasynan 35 km qashyqtyqta ornalasqan.
- Oqıǵa ornyna kelgen kezde tórt deńgeıli temir beton sorǵy ǵımaratynyń 3-shi jáne 4-shi deńgeıde segiz uıashyqtan turatyn baqylaý-taratý qurylǵysy, aǵash esik, jalpy alańy 150 sh. m. aǵash qabyrǵalardyń qaptamasy, 100 qýma metr oqshaýlaý kúshtik kabeldiń janýy anyqtaldy, - deıdi departamentte.
30 tamyzda órt saldarynan birneshe agregat isten shyqqan. Materıaldyq shyǵyn 270 mln teńgeni qurady. Osyǵan baılanysty aǵymdaǵy jyldyń 31 tamyzynda Ekibastuz qalasy ákiminiń tóraǵalyǵymen tótenshe jaǵdaılar jónindegi qalalyq komıssııanyń kezekten tys otyrysyn ótkizip, jergilikti aýqymdaǵy tótenshe jaǵdaı jarııalaý josparlanǵan. Keıinnen qaýly Ekologııa, geologııa jáne tabıǵı resýrstar mınıstrligine sorǵyny jóndeýge qarjy bólý týraly joldanady.
Sorǵy stantsııasynyń basshysy V. Egerdiń aıtýynsha, jóndeý jumystary shamamen 10 kúnge sozylady, eldi mekenderge qaýip tónbeıdi. Qazirgi ýaqytta Ekibastuz sý qoımasynda 17 mln tekshe sý, Ekibastuz qalasynyń sýdy tutynýdyń aılyq normasy 1,7 mln tekshe quraıdy. Qaraǵandy oblysy úshin de qaýip joq.
