Sátbaev atyndaǵy QazUTÝ-da Jeńistiń 70 jyldyǵyna arnalǵan memorıaldy Dańq taqtasy ashyldy

ALMATY. QazAqparat - Almatyda Q.I.Sátbaev atyndaǵy Qazaq Ulttyq tehnıkalyq ýnıversıtetinde QR Otan qorǵaýshy kúni men Jeńistiń 70 jyldyǵyna arnalǵan merekelik shara ótti.

Aıta keteıik, soǵys bastalǵan tusta QazUTÝ-dan 200 stýdent pen 22 oqytýshy maıdanǵa attanǵan. Osyǵan oraı ýnıversıtet qabyrǵasynda Jeńistiń 70 jyldyǵyna arnalǵan memorıaldy Dańq taqtasy ashyldy. Eskertkish taqtaǵa el basyna kún týǵan zamanda atalmysh oqý ornynan maıdanǵa attanǵan erlerdiń esimderi jazylǵan. Olardyń altaýy Keńes Odaǵynyń Batyry atandy. Elimizdi jaýdan qorǵaý úshin ómirin qıǵan jandardyń jankeshti erlikteri - búgingi jas urpaq úshin úlgi-ónege. Shara barysynda soǵys ardagerlerine arnaıy medalder tabystalyp, erekshe qurmet kórsetildi.

«Soǵys jyldarynda bizdiń ýnıversıtetimiz de jeńistiń kelýine óz úlesin qosty. Alǵashqy jyldary 200 stýdentpen qatar ınstıtýt dırektory A.I.Koktov pen partııalyq uıymnyń jetekshisi M.Qurmanǵalıev Otan qorǵaýshylar sapyn túzedi. Olar jáne basqa da azamattar qaıta oralmady. Alaıda, bizdiń ujym olardyń esimin eshqashan umytpaıdy. Olardyń erligi jadymyzda saqtaý - bizdiń paryzymyz», - dedi QazUTÝ rektory J.Ádilov.

Onyń aıtýynsha, kórsetken erligi men batyrlyǵy úshin Musa Baımuhanov, Maksım Gýbanov, Vladımır Zasıadko, Nıkolaı Markelov, Alekseı Toropkın, Nıkolaı ıAşenkolar Keńes Odaǵynyń Batyry ataǵyn ıelendi. Al ushqysh, aty ańyzǵa aınalǵan tulǵa Talǵat Bıgeldınov eki márte Keńes Odaǵynyń Batyry ataǵyn ıelendi.

Saltanatty sharaǵa UOS ardagerleri, tyl eńbekkerleri, aýǵan soǵysyna, Chernobyl AES-syndaǵy apatty joıýǵa qatysqan azamattar shaqyryldy.

Dańq memorıalynda gúl shoqtaryn qoıý rásiminen soń ardagerlerge qazaqstandyq úlgidegi keýde lentalary tabys etildi.