Sátbaev atyndaǵy kanaldyń apattyq jaǵdaıda turǵan bógeti nyǵaıtylyp jatyr
PAVLODAR. KAZINFORM — Pavlodar oblysynda keler jylǵy sý tasqynyna daıyndyq bastaldy. Qorǵanys bógetteri nyǵaıtylyp, sý burý arnalaryn tazartý qolǵa alynǵan.
Óńirlik tótenshe jaǵdaılar departamentiniń málimetinshe, gıdrotehnıkalyq nysandar jańǵyrtylyp jatyr. 13 ınjenerlik joba aıaqtalyp, 150 metr qorǵanys bógeti nyǵaıtylǵan.
— Daıyndyq jumystary Qanysh Sátbaev atyndaǵy kanalda da júrgizilip jatyr. Atap aıtqanda, Ekibastuz óńirindegi uzaq ýaqyt apatty jaǵdaıda bolǵan № 87 bógetti qaıta jańǵyrtý qolǵa alyndy. Nysanda sý ótkizý júıesi qalpyna keltirilip, bógettiń jaı-kúıin baqylaýǵa arnalǵan avtomattandyrylǵan júıe ornatylýda. Jóndeý jumystaryn jyl sońyna deıin aıaqtaý josparlanǵan, — dep málimdedi departamentten.
Qazirgi ýaqytta tirek bógettegi prızmasyn ornatý, drenaj júıesi men sý ólsheý beketin qalpyna keltirý, joǵarǵy eńistiń plıtalaryn jóndeý, sondaı-aq avtomattandyrylǵan monıtorıng júıesin ornatý jumystary júrgizilip jatyr.
Mamandar sondaı-aq «Bogatyr–Karataı», «Lýgansk–Konstantınovka» jáne «Rojdestvenka–Pavlovka» avtokólik joldarynyń ýchaskelerine sý ótkizetin qubyrlar salynyp jatqanyn aıtady. Júzege asyrylyp jatqan is-sharalar oblys qalalary men aýdandarynyń eldi mekenderin qamtıdy jáne olardy yqtımal sý tasqynynan qorǵaý deńgeıin arttyrýǵa baǵyttalǵan.
Eske sala keteıik, Tobyldaǵy bóget 3 500-ge deıin úıdi tasqynnan qorǵaıdy.
