Sátbaev atyndaǵy kanaldy jańǵyrtýǵa 12 mlrd teńge bólindi
PAVLODAR. KAZINFORM - Kanaldyń jabdyqtary 50 jyldan astam ýaqyt boıy paıdalanylyp keledi jáne qazirgi tańda tehnıkalyq ári moraldyq turǵydan eskirgen. Búginde bir sorǵy stansasynda jańartý jumystary bastaldy.
Májilis depýtattary Nurjan Áshimbetov, Vera Kım jáne Jarqynbek Amantaı jumys sapary aıasynda Qanysh Sátbaev atyndaǵy kanaldyń № 2 sorǵy stansasyndaǵy elektrmehanıkalyq jabdyqtardy jańǵyrtý barysymen tanysty.
«Qazsýshar» RMK «Q. Sátbaev atyndaǵy kanal» fılıalynyń bas ınjeneri Maksım Emmerıhtiń aıtýynsha, QR Sý resýrstary jáne ırrıgatsııa mınıstrligi ázirlegen jol kartasy sheńberinde energetıkalyq jáne gıdromehanıkalyq jabdyqtardy jańǵyrtý jumystary júrgizilýde. Kanaldyń jabdyqtary 50 jyldan astam ýaqyt boıy paıdalanylyp keledi jáne qazirgi tańda tehnıkalyq ári moraldyq turǵydan eskirgen. № 1 sorǵy stansasyn jańartý jumystary bastaldy. Sonymen qatar bıyl bes jańa sorǵy agregatyn jetkizý úshin «Ýralgıdromash» AQ-men kelisimshart jasalǵan. Jalpy, 2028 jylǵa deıin 19 gıdrojabdyqty aýystyrý josparlanǵan.
— Qanysh Sátbaev atyndaǵy kanal — Ortalyq Qazaqstan úshin negizgi sý arnasy. Ol Pavlodar, Qaraǵandy, Aqmola oblystaryna qarasty qalalar men iri eldi mekenderdi, Astana qalasynyń kásiporyndaryn sýmen qamtamasyz etedi. Shynymen de biregeı ári strategııalyq mańyzy bar nysan. Alaıda uzaq jyldar boıy sheshimin tappaı kele jatqan mańyzdy másele bar, jabdyqtardyń 90 paıyzdan astamy tozǵan. Al keıbir sorǵy agregattaryn shuǵyl aýystyrý qajet. Mysaly bıyl jáne keler jyly jalpy quny shamamen 11 mıllıard teńge bolatyn bes sorǵy agregatyn aýystyrý josparlanǵan. Qarajattyń bir bóligi bólindi, alaıda bul jetkiliksiz. Taǵy 14 sorǵy úshin qosymsha qarjy qajet, - dedi depýtat Vera Kım.
Nurjan Áshimbetov buǵan deıin júrgizilgen jóndeý jumystarynyń sapasyz bolǵanyn atap ótti. 2023 jyly № 2 sorǵy stansasynda iri apat bolyp, elektrmen jabdyqtaý tolyq toqtaǵan. Atalǵan oqıǵa jabdyqtardyń meılinshe tozǵanyn dáleldep, shuǵyl jańǵyrtýdyń qajettiligin baıqatqan edi.
— Pavlodar jáne Qaraǵandy oblystarynan saılanǵan segizinshi shaqyrylym depýtattarynyń bastamasymen bul másele respýblıkalyq deńgeıde kóterildi. Qazirgi tańda respýblıkalyq bıýdjetten 12 mıllıard teńgeden astam qarjy bólindi, - dedi ol.
Jarqynbek Amantaıdyń aıtýynsha, kanal sýyn iri óndiristik kásiporyndar da paıdalanyp otyr. Bolashaqta osy arna arqyly Astanaǵa da sý jetkizilip, elordadaǵy sý tapshylyǵy máselesin sheshýge jol ashady.
Buǵan deıin Úkimette Sátbaev kanalynan Astanaǵa deıin sý qubyryn salý jobasy talqylanǵany týraly jazǵanbyz.
Al ótken jyly Sý resýrstary jáne ırrıgatsııa mınıstri Sátbaev atyndaǵy kanal 5 jylda tolyq jańǵyrtylatynyn aıtqan bolatyn.