Sátbaev ákimdiginiń 80 mln teńgege túsirilip jatqan serıaly daýǵa qaldy

JEZQAZǴAN. KAZINFORM — Sátbaev qalasy ákimdiginiń tapsyrysymen túsirilip jatqan áleýmettik serıal qoǵamda daý týǵyzdy. Qala bıýdjetinen 78,5 mıllıon teńge bólingen bul jobaǵa qatysty Sybaılas jemqorlyqqa qarsy qyzmet tekserý júrgizip jatyr.

Serıal túsirýge qomaqty qarjy bólingeni jónindegi aqparat tanymal telegram- arnada jarııalanǵan soń órshı tústi. Qala ákimdigi joba negizinen tárbıelik sıpatta ekenin aıtyp, qarjylandyrýdy Prezıdenttiń kreatıvti ındýstrııany damytý jónindegi tapsyrmasymen baılanystyrdy.

«Memleket basshysy kreatıvti ındýstrııany ınklıýzıvti ekonomıkanyń mańyzdy baǵyty retinde atady. Osy oraıda, biz 10 bólimnen turatyn „Ne kerek?“ atty áleýmettik veb-serıaldy iske asyrdyq. Jobanyń maqsaty — jastardy nashaqorlyq, tártipsizdik pen turmystyq zorlyq-zombylyqtan saqtandyrý ári qalanyń jas azamattarynyń áleýetin kórsetý», — dep málimdedi Sátbaev qalasy ákimdiginiń ishki saıasat bólimi.

Alaıda jobanyń oryndaýshysy retinde oblystyq máslıhat depýtatyna tıesili kompanııa tańdalýy kúmán týdyrdy. Bul rette ákimdik memlekettik satyp alý zańnamasy tolyq saqtalǵanyn aıtyp aqtaldy.

«Tehnıkalyq jáne shyǵarmashylyq múmkindikterge súıene otyryp, jergilikti talanttardy qoldaý úshin kelisimshart „ErNarMedia“ JShS-men tikeleı jasaldy. Bul sheshim ishki aýdıt pen monopolııaǵa qarsy organnyń kelisimimen, QR „Memlekettik satyp alý týraly“ zańynyń 16-baby, 3-tarmaǵy, 2-tarmaqshasyna sáıkes qabyldandy», — dep naqtylady ishki saıasat bólimi.

Ákimdiktiń málimetinshe, serıal bıýdjetiniń basym bóligi kásibı akterlerdiń eńbekaqysyna jáne joǵary sapaly tehnıkany (4K kamera, jaryq, dybys, postprodakshn) jalǵa alýǵa jumsalǵan. Qazirdiń ózinde alǵashqy úsh bólim túsirilip, ekeýi YouTube jelisinde júktelgen. Qalǵan bólimder apta saıyn jarııalanady. Onlaın-kórsetilim aıaqtalǵan soń serıal «Ulytau» jáne «Aqsham» telearnalaryna usynylady.

«Joba tek kreatıvti ekonomıkany qoldaý ǵana emes, sonymen qatar óńirdiń áleýmettik problemalaryn ashyq kórsetip, jastar arasynda oń qundylyqtardy nasıhattaýǵa baǵyttalǵan», — dedi ákimdiktegiler.

Atalǵan jaǵdaıǵa baılanysty Sybaılas jemqorlyqqa qarsy is-qımyl agenttiginiń Ulytaý oblysy boıynsha departamenti túsinikteme berdi. Vedomstvo ókilderi joba boıynsha ótinish túskenin rastap, materıaldar tergelip jatqanyn habarlady.

«Sybaılas jemqorlyqqa qarsy is-qımyl agenttiginiń Ulytaý oblysy boıynsha departamentine osy jobaǵa qatysty ótinish kelip tústi. Qujattar Básekelestikti qorǵaý jáne damytý agenttiginiń óńirlik departamentine saraptama jasaý úshin jiberildi. Qazirgi tańda materıaldar polıtsııa departamentine joldandy. Tergeý júrgizilip jatyr, ázirge naqty túsinikteme bere almaımyz», — delingen Antıkor málimdemesinde.

Aıta keteıik, buǵan deıin Ulytaý oblysynda sybaılas jemqorlyq kúdigimen oblystyq sot alqasynyń tóraǵasy ustalǵan bolatyn.