SAT emtıhanynan 1530 ball jınaǵan qazaqstandyq oqýshy Berkeley ýnıversıtetine tústi
ASTANA. KAZINFORM — Almatylyq Mansur-Soıor Dosanov University of California, Berkeley ýnıversıtetine matematıka jáne fızıka baǵyty boıynsha oqýǵa qabyldandy, dep habarlaıdy Oqý-aǵartý mınıstrliginiń baspasóz qyzmeti.
AQSh ýnıversıtetterine túsýge daıyndyqty Mansur 2023 jyly bastady. Oqýǵa túsý úshin qajet SAT halyqaralyq emtıhanynyń qorytyndysy boıynsha ol 1600 múmkin baldyń 1530-yn jınady. Sonymen qatar Mansur aǵylshyn tili boıynsha halyqaralyq IELTS emtıhanynan 8.5 ball aldy. Bul nátıjeler — kópjyldyq eńbektiń, úzdiksiz oqý men tártiptiń, sondaı-aq ózin-ózi damytýǵa baǵyttalǵan turaqty jumystyń jemisi.
Mansur ómiriniń alǵashqy kúnderinen bastap tserebraldy sal aýrýy dıagnozymen ómir súrip keledi. Qıyndyqtarǵa qaramastan, ol bilim alyp, damyp, óz maqsattaryna senimdi túrde umtyldy. Mansurdyń oqıǵasy ınklıýzıvti bilim berýdi damytýdyń jáne ár balanyń óz áleýetin ashýyna múmkindik beretin jaǵdaı jasaýdyń qanshalyqty mańyzdy ekenin kórsetedi.
Onyń jetistikterinde otbasynyń qoldaýy erekshe ról atqardy. Mansurdyń ata-anasy ulyn ár kezeńde qoldap, onyń damýyna barlyq jaǵdaıdy jasap keledi.
Mansur júzýmen aınalysady, aspazdyqqa qyzyǵady jáne saksofonda oınaıdy. Mýzykalyq aspapty meńgerý men oqýǵa túsýge daıyndalý odan úlken erik-jigerdi talap etti.
Búginde onyń jetistigi otbasynyń qoldaýy, júıeli eńbek pen bilimge umtylys úlken maqsattarǵa jetýge múmkindik beretininiń jarqyn úlgisi bolyp otyr.
University of California, Berkeley — álemdegi jetekshi zertteý ýnıversıtetteriniń biri. Bul oqý ornymen ondaǵan Nobel syılyǵynyń laýreattary baılanysty, al onyń ǵylymı mektebi matematıka, fızıka, ınjenerııa jáne kompıýterlik ǵylymdar salalaryndaǵy eń myqty mektepterdiń biri sanalady. Berkeley ýnıversıtetine túsý AQSh ýnıversıtetteri arasyndaǵy eń joǵary básekeli qabyldaýlardyń biri bolyp esepteledi.
Budan buryn UBT-da 132 ball jınaǵan atyraýlyq túlek Ońtústik Koreıa ýnıversıtetine oqýǵa túskenin jazdyq.
