Sasyq ıisten sharshaǵan astanalyq kórshisin sotqa berdi
ASTANA. QazAqparat - Astana qalalyq soty elordalyq turǵyndy páterin kúl-qoqystan tazartýǵa mindettedi, dep habarlaıdy QazAqparat.
Qalalyq sot baspasóz qyzmeti taratqan málimetke qaraǵanda, elordadaǵy úılerdiń biriniń turǵyny kórshisiniń ústinen shaǵym túsirgen. Onyń aıtýynsha, kórshisi páterine, balkonyna qoqys konteınerinen ákelingen qaldyq zattarǵa toltyryp qoıyp júrgen. Sonyń saldarynan búlingen qoqys ıistenip, tipti kórshileriniń de páterlerine sasyq ıis jetken.
«Jaýap berýshiniń ózi atalǵan páterde turmaıdy. Ol ıti men mysyǵyn tamaqtandyrý úshin ǵana keledi. Kórshileriniń birneshe márte páterin tazalaýdy ótingen sózderine qulaq aspaǵan. Astana qalalyq tutynýshylar quqyǵyn qorǵaý basqarmasy ókiliniń qorytyndysyna sáıkes jaýap berýshiniń páteri antısanıtarlyq jaǵdaıda. Almaty aýdandyq soty shaǵymdanýshynyń talabyn qanaǵattandyryp, jaýap berýshige páterin turmystyq qoqystan tazalaýdy jáne dezınfektsııalyq óńdeý júrgizýdi mindettedi. Sheshim zańdy kúshine endi», - delingen taratylǵan aqparatta.
