Sasyq ıisten mezi bolǵan aqtóbelikter bılikten máseleniń sheshimin surady
AQTÓBE. QazAqparat - Aqtóbede jaz boıy qolqany qabatyn sasyq ıis turǵyndardyń mazasyn alady. Allergııa, qan qysymy dertine shaldyqqandar búgin qaladaǵy «Densaýlyq» saıabaǵyna jınalyp, bılikten shara qoldanýdy surady, dep habarlaıdy QazAqparat tilshisi.
Aqtóbe qalasyndaǵy sasyq ıisten sharshaǵan bir top adam búgin «Densaýlyq» saıabaǵyna jınaldy. Keshkilik bastalyp, túni boıy aýada turatyn jaǵymsyz ıistiń qashan ketetinin bilmekke jınalǵandardy oblystyq jergilikti polıtsııa qyzmetiniń basshysy Qanybek Jaqsyǵalıev bastaǵan tártip saqshylary baqylap turdy. Jınalǵandarǵa sasyq ıistiń qaıdan shyǵatynyn oblys ákiminiń orynbasary Qaırat Bekenov, oblystyq ekologııa departamentiniń basshysy Jaqsyǵalı Imanqulov túsindirip berdi. Aýany kóbine kómirtek totyǵy, azot totyǵy, beıorganıkalyq shań, kúkirttiń eselengen totyǵy lasaıdy.
«Qala kórkeıip, joldar da jóndelip jatyr. Indýstrııalyq qala ekenin bilemiz. Biraq qarapaıym adamdar úshin ómir súrý qıyndap barady. Sasyq ıis qolqany qabady. Sondyqtan áleýmettik jelide arnaıy top quryp, jaǵymsyz ıisten sharshaǵandardyń basyn qostyq. Bul ashyq alań. Senbiden jeksenbige qaraǵan túni shydamymyz taýsylǵan bolatyn. Bul másele sheshiledi degen úmittemiz»,- dedi áleýmettik jelide top quryp, aqtóbelikterdi birigýge shaqyrǵan Erik Oramaqov.
Jaǵymsyz ıis damýy tejelgen balalar úshin de qıyn bolyp tur. «Sońǵy 5 jylda sasyq ıis bizdiń shydamymyzdyń shegine jetti. Biz ákimdiktiń saıtyna, blogqa, áleýmettik jelige jazyp, naqty jaýap ala almadyq. Keıbiri suraǵymyzdy óshirip tastady. Men anamyn. Balam erekshe dıagnozben dúnıege keldi. Aýada sasyq ıis turǵan kezde balam loqsyp, qusady. Eger tereze jabýdy umytyp ketsek, jylap, kózi jasaýrap ketedi. Sóıtip túni boıy mazasyzdanyp shyǵamyz»,- deıdi qala turǵyny Áıgerim Bıjanova.
Aıta keteıik, Aqtóbe qalasynda aǵyn sýdy qabyldaıtyn qosymsha stantsııa iske qosylady. Taǵy ekeýiniń qurylysy júrip jatyr. Ekologtar bul sheshim sasyq ıistiń mólsherin azaıtýǵa septigin tıgizedi dep otyr. Sonymen qatar, oblystyq bıýdjetten qala mańyndaǵy qaldyq-qoqystardy tazartýǵa 15 mıllıon teńge bólingen.
«Kún qatty ysyp, jaǵymsyz ıis kúsheıdi. Bul suraq birneshe jyldan beri kóterilip keledi. Negizgi másele óndiris oryndary men qyzmet kórsetý kompanııasynyń aǵyn sýdy ýaqtyly tazartpaýynan bolyp tur. Zııandy zattardy atmosferaǵa tastaıtyn 20-dan astam kásiporyn anyqtaldy. Olar ekologııalyq normany saqtamasa óndiris oryndaryn toqtatý sharasyn da qabyldaımyz»,- dedi Aqtóbe oblystyq ekologııa departamentiniń basshysy Jaqsyǵalı Imanqulov. Ekologtar óndiris oryndaryna aǵyn sýdy tazartý qondyrǵysyn ornatýdy talap etip otyr. Qazirgi ýaqytta óńirde aýadaǵy kúkirti sýtektiń mólsheri shamadan tys artyp ketti. Qazgıdromettiń málimetinshe, shildede kórsetkish qalypty shamadan 25 ese kóp ekendigin kórsetken.
