Sasyq ıispen kúresip júrgen aqtóbelik sheneýnik allergııasy bar ekenin jasyrmady

Aqtóbe qalasynda sasyq ıis ýshyǵyp, turǵyndar bılikten jaýabyn suraǵan bolatyn.  Sol kezde dárigerler de óńirde allergııa ýshyǵyp ketkenin habarlady. Búgin Aqtóbe oblysy ákiminiń orynbasary Qaırat Bekenov jergilikti belsendiler men kásiporyn basshylaryn jınady.

«Elimizde moratorıı jarııalanyp, biz bıznestiń damýyna jaǵdaı jasadyq. Biraq keıbir kásipkerler moratorııdi óz paıdasyna jaratyp, káriz qubyryna sýdy keri aǵyzý kezinde sanıtarlyq normalardy saqtaýdan bas tartyp otyr. Aqtóbeniń belsendi tobyna alǵys aıtamyz. Turǵyndardyń aryzynan soń tekserý jumystary bastalyp, qazir 40 kásiporynǵa 40-70 AEK mólsherinde aıyppul salyndy. Olardyń arasynda eki iri spırt zaýyty bar. Spırt zaýyty qazir jańa tazartý qurylǵysyn iske qosyp, káriz qubyryna tastalatyn qaldyq normaǵa saı tazartylyp jatyr»,- dedi Q.Bekenov.

Óńir ekologtary tekserý jumystaryn ári qaraı jalǵastyrady. Eki aıda 382 óndiris ornynan synama alynýy tıis. Sonymen qatar, Aqtóbe oblystyq ekologııa departamenti sý jetkizýshi «Aqbulaq» AQ-men birge talapty saqtamaǵan óndiris oryndaryn apta saıyn tekserýdi qolǵa almaq. Qazirgi kúni 29 kásiporynǵa aıyppul salynyp, bireýi jumysyn toqtatty. Taǵy 10 kásiporynnyń jumysy tekserilip jatyr.

«Aqbulaq» AQ-nyń aryzy boıynsha 57 nysandy tekseremiz. Qazirgi kúni 17 kásiporyn tekserildi. Barlyǵy 181 myń teńge aıyppul salyndy. Taǵy 12 ákimshilik is qaralyp jatyr», - dedi oblystyq tutynýshylardyń quqyqtaryn qorǵaý basqarmasynyń basshysy Nursulý Berkimbaeva.

Jergilikti bılik aýany lastap, jaǵymsyz ıis týdyratyn kásiporyndardy qatań baqylap, zań talaptary oryndalmasa jabý máselesi sot arqyly sheshiletinin eskertti. «Qatań baqylaý bolady. Turǵyndar narazylyǵyn kórip otyrmyz. «Siz ózińiz ıisti sezinesiz be?» dep suraıdy turǵyndar. Iá, seziledi. Mende de allergııa bar», - dedi Qaırat Bekenov.