Saryshaǵanda «Jaýyngerlik dostastyq-2013» jattyǵýlarynyń sheshýshi kezeńi ótýde

ASTANA. 16 tamyz. QazAqparat - Qaraǵandy oblysyndaǵy «Saryshaǵan» polıgonynda Ujymdyq qaýipsizdik týraly shart uıymyna qatysýshy memleketterdiń áýe shabýylyna qarsy birlesken qorǵanys júıesi aıasynda «Jaýyngerlik dostastyq-2013» taktıkalyq oqý-jattyǵýynyń sheshýshi kezeńi ótip jatyr. Bul týraly QR Qorǵanys mınıstrliginiń baspasóz qyzmetinen habarlady.

Oqý-jattyǵý barysynda áýe shabýylyna qarsy qorǵanys áskerleriniń quramalary, bólimder men bólimsheleri arasyndaǵy ózara is-qımyl, sondaı-aq jaýyngerlik toptardyń elimizdiń áýe shebin qorǵaýdaǵy daǵdysyn jetildirý máseleleri pysyqtalatyn bolady. Sonymen qatar, TMD Áýe shabýylyna qarsy qorǵanys áskerleriniń kúshteri men quraldarynyń birlesken jaýyngerlik kezekshilikti júrgizýdegi ózara is-qımyldary kórsetiledi. Bul rette qoıylǵan tapsyrmalardyń sátti oryndalýy úshin jeke quramnyń joǵary moraldi-psıhologııalyq, jaýyngerlik jáne kásibı sapasyn arttyrýǵa barynsha mán beriledi.

Naqty jaýyngerlik atystardy qamtyǵan taktıkalyq oqý-jattyǵýǵa Áýe shabýylyna qarsy qorǵanys áskerleriniń 70-ten astam jaýyngerlik toby tartylǵan.

Shynaıy jaýyngerlik is-qımyldarǵa keltirilgen áýe shabýylyna qarsy jaǵdaılardy týǵyzý úshin QR QK Áýe qorǵanysy kúshteri oqý ortalyǵynyń jaýyngerlik toptary kúrdeli nysanalyq jaǵdaı qalyptastyrǵan.