Saryshaǵanda toqtatylǵan poıyz jolaýshylaryna ystyq as ázirlendi
ASTANA. QazAqparat - Júk tasymaldaýshy vagondar relsten shyǵyp ketip, jolynan qalyp qoıǵan jolaýshylar úshin ystyq as ázirlendi, dep habarlaıdy QazAqparat tilshisi.
«Biz munda tańǵy 9-dan beri turmyz. Jergilikti áskerı bólimshe bes poıyzdyń jolaýshylary úshin ystyq as daıyndady. Saryshaǵan stansasynda jaǵdaıdy birqalypty ustaý úshin jedel járdem jáne órt qaýipsizdigi kólikteri jınaldy», - dedi QazAqparat tilshisine Almatyǵa attanǵan poıyz jolaýshylarynyń biri.
Sondaı-aq, ol temirjoldaǵy qozǵalystyń qaıta bastalǵanyn kútpegen keı jolaýshylar qalaaralyq taksılerge otyryp, jolǵa attanǵanyn aıtty. Onyń aıtýynsha, ár kóliktiń salonyn jaldaý quny 50 myń teńge bolǵan.
Eske salaıyq, Saryshaǵan stansasynda júk poıyzdary vagondary (Qashqanteńiz-Jastar aralyǵyndaǵy Moıynty-Shyǵanaq bóliginde kele jatqan №2009 poıyz) relsten shyǵyp ketip, bes jolaýshy poıyzynyń qozǵalysy toqtatylǵan edi. Oqys oqıǵadan zardap shekkender joq.
