Saryshaǵanda toqtap turǵan poıyzdar jolǵa shyqty
ASTANA. QazAqparat - Júk poıyzynyń relsten shyǵyp ketýine baılanysty Saryshaǵan stansasynda toqtap qalǵan jolaýshy poıyzdary jolǵa shyqty, dep habarlaıdy QazAqparat.
Bul týraly «QazAqparat» tilshisine Almatyǵa jol tartqan poıyzdardyń bireýiniń jolaýshysy aıtyp berdi.
Onyń aıtýynsha, temirjoldaǵy qozǵalystyń qaıta jandanýyn kútpegen keı jolaýshylar qalaaralyq taksılerge otyryp, jolǵa attanǵan. "Ár kóliktiń salonyn jaldaý quny 50 myń teńge boldy" deıdi ol.
Eske salaıyq, Saryshaǵan stansasynda júk poıyzdary vagondary (Qashqanteńiz-Jastar aralyǵyndaǵy Moıynty-Shyǵanaq bóliginde kele jatqan №2009 poıyz) relsten shyǵyp ketip, bes jolaýshy poıyzynyń qozǵalysy toqtatylǵan edi. Oqys oqıǵadan zardap shekkender joq.
Toqtap qalǵan poıyz jolaýshylaryna ystyq tamaq berilip, jedel járdem jáne órt qaýipsizdigi kólikteri kezekshilikte boldy.
Sonymen qatar, júk poıyzynyń relsten shyǵýynyń aldyn ala sebepteri aıtylǵan bolatyn.
