Saryózendik sýpermen: 82 jastaǵy aqsaqal aýyldastaryn qar qursaýynan qutqaryp júr
82 jastaǵy Mınıaǵzam Avlırıamov áli kúnge deıin DT-75 traktoryn júrgizedi. Qarapaıym qarııa aýyldastaryna jazda shóp shabýǵa kómektesedi, al qysta qar basqan joldardy tazalaıdy. Ol jumystyń bárin tegin isteıdi.
Keıipkerimiz turatyn aýyl aýdan ortalyǵynan 320 shaqyrym jerde ornalasqan. Arnaıy tehnıka aýdan ortalyǵynan Tikenektige jetkenshe qar qursaýynda jatqan eldimeken órkenıetten ajyrap qalýy múmkin.
«60 jyl buryn Saryózen sovhozyna traktorshy bolyp jumysqa turdym, qazir aýyl Tikenekti dep atalady. Mundaǵy alǵashqy aǵashtardy biz ektik, alǵashqy úılerdiń irgetasyn biz qaladyq desem, artyq aıtqanym emes. Osy aýylda úılendim, úı boldym, bes bala tárbıeledim. Men óz traktoryma (DT-75) Dos-Temir dep at qoıǵam. Traktorsyz ómirimdi elestete almaımyn. Onyń motorynyń gúrili men úshin júregimniń dúrsili sııaqty. Eshqashan maqtaý men marapat suraǵan joqpyn. Tek meniń aq-adal tirshiligim jastarǵa úlgi bolsa eken», - deıdi Mınıaǵzam ata.
Aýyldastary da Mınıaǵzam ata jaıly tek jaqsy pikirde. Olar úshin aqsaqal – jol tazalaýshy ǵana emes, naǵyz qutqarýshy.
«Ol kisi bizge óte jaqyn adam. Mınıaǵzam atanyń arqasynda qysta 300 úıdiń joly ashyq. Oblys ortalyǵynda oqıtyn balalar ýaqytymen otbasyna oralady, jedel járdem de úzdiksiz kelip-ketip jatady. Al nemelerimiz ony «Saryózendik Sýpermen» dep ataıdy», - dep aǵynan jarylady aýyl turǵyny Almash apaı.
