Saryózek turǵyndary úıden qubyr tartyp, turmystyq qaldyqty aryqqa aǵyzǵan
TALDYQORǴAN. QazAqparat - Almaty oblysyndaǵy Kerbulaq aýdanynyń ortalyǵy — Saryózekte turǵyndar turmystyq qaldyqtardy aryqqa aǵyzǵan, - dep habarlaıdy QazAqparat tilshisi.
Áleýmettik jelige taralǵan vıdeoda eski úılerdiń balkonynan, qabyrǵasynan uzyn qubyrlardyń daladaǵy aryqqa qaraı baǵyttalyp, jasalǵanyn kórýge bolady.
«Saryózek. Dárethana»,- dep pikir bilderedi vıdeo avtory.
Almaty oblystyq sanıtarııalyq-epıdemıologııalyq baqylaý departamentiniń baspasóz qyzmeti atalǵan jaıtqa baılanysty túsinikteme berdi.
«Instagram jelisinde Kerbulaq aýdany, Saryózek aýylyndaǵy 2 qabatty úıden qubyrlar arqyly syrtqa káriz sýynyń aǵyp jatqany týraly vıdeo tarady. Shuǵyl túrde jergilikti ákimdik, aýdandyq polıtsııa bólimi, aýdandyq sanıtarııalyq-epıdemıologııalyq basqarma mamandarynan komıssııa qurylyp, atalǵan mán-jaıdy tekserdi. Tekserý kezinde anyqtalǵandaı, joǵaryda atalǵan 2 qabatty úıler Saryózek aýylynyń Ál-Farabı kóshesinde ornalasqan. Jeke menshik ıeliginde. Turǵyndar eshkimniń kelisiminsiz turmystyq qaldyq sýlardy qubyr arqyly kóshedegi aryqqa baǵyttap, tókken. Komıssııa jergilikti turǵyndarǵa túsindirý jumystaryn júrgizip, atalǵan is-árekettiń zańsyz ári qorshaǵan ortaǵa epıdemıologııalyq turǵydan qaýipti ekendigi túsindirildi. Nátıjesinde turmystyq qaldyq sýlardy negizsiz tókkeni úshin atalǵan 2 úıdiń turǵynyna QR ÁQB týraly Kodeksiniń 505-baby boıynsha eskertý berilip, trýbalar alynyp tastaldy»,- delingen vedomstvonyń habarlamasynda.
