Sarybulaq ózeni astanalyqtardyń jańa demalys ornyna aınalady
ASTANA. QazAqparat - Astanada Sarybulaq ózeniniń mańynda demalys aımaǵy salynady, dep habarlaıdy QazAqparat.
Bul týraly Astana qalasynyń otyn-energetıkalyq keshen jáne kommýnaldy sharýashylyq basqarmasynyń basshysy Erbol Tóleýov qalanyń ekologııalyq jaǵdaıyn jaqsartý týraly «QazAqparat» HAA resmı saýalyna bergen jaýabynda málimdedi.
«Baıqońyr» aýdany aýmaǵynda Astananyń qalalyq ortany regeneratsııalaý basqarmasy «Sarybulaq ózeniniń temir jol kópirinen JES-1 jaqqa qaraı qalaǵa deıingi jaǵalaý beldeýin jaqsartý, sý qorǵaý aımaǵy men jolaqtardy ornatý» qurylysyn júzege asyrýdy bastady. Bas merdiger - «Spetsstroı» kompanııasy» JShS», - dep habarlady E. Tóleýov.
Qurylys barysynda Sarybulaq ózeniniń arnasyn abattandyrý kózdelgen. Jaǵalaý mańy kógaldanady, gúlzar baqtar men sándik aǵashtar egiledi. Astana men qala mańy turǵyndarynyń demalýy úshin jaıly jaǵdaı jasalady.
Sonymen birge, tasqyn qaýpi bar sý aǵynynyń ótýin qamtamasyz etý, irgeles ǵımarattardy sý tasqynynan qorǵaý, aýmaqtyń ekologııalyq jaǵdaıyn jaqsartý josparlanyp otyr.
Ákimdiktiń habarlaýynsha, 2018 jyldyń 16 qazanynda bastalǵan qurylys 2019 jyldyń 4-toqsanynda aıaqtalýy tıis. Qazirgi ýaqytta sý túbin plıtalarmen jabdyqtaý jumystary júrip jatyr.
