Saryarqa jáne Dostyq metro stansalary qashan ashylady
ALMATY. QazAqparat – Respýblıkalyq bıýdjetten tolyq qarjylandyrylatyn bolsa, Almaty metrosynyń eki jańa beketi - Saryarqa jáne Dostyq 2021 jyldyń jeltoqsan aıynda paıdalanýǵa beriledi, dep habarlaıdy QazAqparat tilshisi.
Almaty qalalyq mobıldilik basqarmasynyń málimetinshi, ekinshi kezeńniń ınvestıtsııalyq quny- 67 922,38 mln teńge.
Jalpy, stansalar qurylysy bastalǵaly 63 278,28 mln teńge bólindi, onyń 52 629,58 mln teńgesi ıgerildi.
«2021 jylǵa arnalǵan bekitilgen bıýdjet aıasynda 10 648,69 mln teńge bólindi, onyń 10 396,97 mln teńgesi respýblıkalyq bıýdjetten, qalǵany jergilikti bıýdjetten qarastyrylǵan. Respýblıkalyq bıýdjetten tolyq qarjylandyrylatyn bolsa, «Saryarqa» jáne «Dostyq» stansalarynyń qurylysyn aıaqtaý bıylǵy jyldyń jeltoqsanyna josparlanǵan» dep atap ótti basqarmadan.
Sonymen qatar, basqarmadaǵylar barlyq metro stansalary Wi-Fi testik rejımde iske qosylǵanyn atap ótti.
Qazirgi ýaqytta tonnelderge jáne elektr jyljymaly quramyna qondyrǵylar ornatý jumystary júrgizilýde.
2018 jyly «Hyundai Rotem» AQ-men metro vagondaryn satyp alý týraly kelisimge qol qoıyldy.
«Qazirgi ýaqytta metro poıyzynyń ekeýi jetkizildi. Qalǵan altaýy 2021 jyldyń birinshi jartyjyldyǵynyń sońyna deıin ákelinedi. 2018-2019 jyldary respýblıkalyq jáne jergilikti bıýdjeten 14 089,7 mln teńge (avanstyq jáne aralyq tólem) bólindi. 2021 jyly túpkilikti tólemdi júzege asyrý úshin respýblıkalyq bıýdjetti naqtylaýǵa 18 660,122 mln teńge ótinim jiberildi» dep habarlady qalalyq mobıldilik basqarmasy.
