«Saryarqa» úzdik úshtikke endi
ASTANA. 27 jeltoqsan. QazAqparat - Búgin Qaraǵandy qalasynyń «Saryarqa» hokkeı klýby syrt alańda «Ermak» (Reseı, Angarsk) komandasyn utty.
Qyzyqty ári tartysty ótken bul oıynnyń alǵashqy shaıbasy tek úshinshi kezeńde ǵana soǵyldy. Buǵan deıingi eki kezeńde komandalar baryn salyp, qarsylastyń qaqpashysyn qapy qaldyrýǵa tyrysty. Úshinshi kezeńde Vıtalııı Aabtyń dál tıgizgen soqqysy «Saryarqany» alǵa shyǵardy. Esep - 0:1. «Ermak» óz shabýyldaryn údetti. Biraq Vladımır Kovachtyń qorǵanysyn buza almady. Al oıynnyń aıaqtalýyna eki mınýttaı qalǵan kezde alań ıeleriniń bas bapkeri qaqpashyny alyp tastap, onyń ornyna taǵy bir oıynshyny shyǵardy. Sóıtip, bir hokkeıshige artyq oınaǵan «Ermak» tarazy basyn teńestirdi. Overtaımda jeńimpaz anyqtalmady. Al býllıt serııasynda Oleg Lomakonyń arqasynda «Saryarqa» jeńiske jetti. Esep - 1:2 (B).
Osy oıynnan keıin Qaraǵandy qalasynyń hokkeı klýby qosymsha eki upaıǵa qol jetkizip, barlyǵy 59 upaımen jalpytýrnırlik kestede 3-shi orynǵa kóterildi.
