«Saryarqa» syrt alańda «Rýbınge» jol berip qoıdy
ASTANA. 5 jeltoqsan. QazAqparat - Qaraǵandy qalasynyń «Saryarqa» hokkeı klýby syrt alańda «Rýbın» (Reseı, Tıýmen) komandasyna jol berip qoıdy.
Bul oıynda alań ıeleriniń basymdyǵy barynsha baıqaldy. Birinshi kezeńde olar eki birdeı shaıba soqsa, ekinshi kezeńde esep aıyrmasyn 3:0-ge deıin jetkizdi. «Saryarqa» tek úshinshi kezeńde ǵana oıanǵandaı boldy. Qarsylastar qaqpasyna eki márte qaýip tóndirse de tarazy basyn teńestire almady. Al «Rýbın» taǵy bir shaıbamen kózge tústi. Qorytyndy esep 4:2.
Aıta keteıik, osy oıynnan keıin Joǵary hokkeı lıgasynyń jalpytýrnırlik kestesinde «Saryarqa» 47 upaımen 9-shy orynǵa syrǵydy. Al «Rýbın» hokkeı klýby «Qaztsınk-Torpedony» artqa tastap, 53 upaımen úshinshi orynǵa kóterildi.
