«Saryarqa» magıstrali Astana qalasy men Qaraǵandy oblysyn gazben qamtıdy
ASTANA. QazAqparat - Qaraǵandy oblystyq ákimdiginde ótken jınalys barysynda «Saryarqa» magıstraldyq gaz qubyrynyń qurylysy» jobasyn qurýshylar negizgi tehnıkalyq sheshimderdi ortaǵa saldy.
Búginde aımaqtaǵy birqatar máseleler sheshimin taýyp jatyr, sebebi gaz magıstraliniń jartysynan kóbi Qaraǵandy oblysy arqyly ótedi, dep habarlaıdy óńir basshysynyń resmı saıty.
«Qazirgi tańda «Saryarqa» magıstraldyq gaz qubyrynyń qurylysy» jobasyn júzege asyrý boıynsha belsendi jumystar júrgizilýde. Búgingi kúnge deıin tehnıkalyq-ekonomıkalyq negizdeme (TEN) quryldy, memlekettik saraptamanyń oń qorytyndysy alyndy. Sondaı-aq jobalyq-smetalyq qujattamalardy qurý aıaqtalý kezeńinde», - dep málimdedi «QazTransGaz» AQ bas dırektorynyń orynbasary Serikqalı Brekeshev.
«QazTransGaz» AQ jobanyń tapsyrys berýshisi bolyp tabylady. TEN qurýshylar retinde «KATEK» JShS konsortsıýmy tańdaldy. Negizgi tehnıkalyq sheshimderdi jınalys barysynda jobalyq uıymnyń bas dırektory Qundyz Nupov tanystyrdy.
Naqtylanǵan málimetter boıynsha, magıstraldyq gaz qubyrynyń Astanaǵa deıingi uzyndyǵy 1063 shaqyrymdy quraıdy, onyń 764-i Qaraǵandy oblysyna tıesili.
«Jer máselelerine, ınfraqurylymǵa qatysty negizgi jumys Qaraǵandy oblysymen baılanysty bolady. Qurylys eki qatarmen júrgiziledi. Birinshisi Astanaǵa gaz berýmen aıaqtalady jáne ol jumystardyń ishine qubyrlardy tóseý jáne gazben qamtý júıesin salý kiredi. Ol 2018-2019 jyldary iske asyrylady. Qurylystyń ekinshi qatary 2019-2020 jyldarǵa josparlanyp otyr. Birinshi kezektiń quny 264,4 mlrd teńgeni quraıdy. Gaz qubyrynyń biregeıligi - onyń 100 atmosfera qysymǵa shydaı alatyndyǵynda",- dep atap ótti baıandamashy.
Qundyz Nupovtyń aıtýynsha, avtomattandyrylǵan gaz taratý stantsııalary Qaraǵandy oblysynyń úsh qalasyna bólingen - Jezqazǵan, Qaraǵandy, Temirtaýda. Sonymen qatar aýdandarǵa arnalǵan áleýetti AGTS-ke qajetti 5 burmalar bolady, olardy daıyn bolýyna qaraı iske qosyp otyrady. Al gazben Qaraǵandy oblysynyń 119 eldi mekeni qamtylady. Esepteýler boıynsha, jyl saıynǵy ınvestıtsııalar 10-15 mlrd teńgege deıin jetedi. Gaz qubyryn salýda paıdalanylatyn qurylys materıaldaryn shyǵaratyn qaraǵandylyq kásiporyndar tańdalyp jatyr. Jobany júzege asyrý qosymsha jumys oryndaryn qamtamasyz etedi: 2 myńǵa deıin adam qurylys kezinde jumyspen qamtylady, 1 myńǵa jýyq jumysker gaz qubyrynyń qyzmet etýin qamtamasyz etý úshin qajet bolady.
Oblys ákimi Erlan Qoshanov qol astyndaǵy qyzmetkerlerge jyldam túrde jáne barynsha jaýapkershilikpen jobalaýshylarmen birlesip, týyndaǵan máselelerdi sheship otyrýdy tapsyrdy.
«Bul jobany bizdiń turǵyndar, kásipkerlerimiz taǵatsyzdana kútti. Gaz - ol bizdiń aımaǵymyzdyń áleýmettik-ekonomıkalyq damýyndaǵy jańa qural. Bul jobany júzege asyrý turǵyndardyń ómir sapasyn joǵarylatýǵa jol beredi», - dep atap kórsetti Erlan Qoshanov.
Ol sonymen qatar jobanyń júzege asyrylýyna qatysty máselelerdi jiti baqylaýǵa alatynyn jetkizdi.
