«Saryarqa» magıstraldyq qubyry: Úlken qalalardan bólek 171 eldi mekenge gaz tartylady
ASTANA. QazAqparat - Kógildir otynmen qamtamasyz etetin magıstral qurylysy «Qyzylorda-Jezqazǵan-Qaraǵandy-Temirtaý-Astana» baǵyty boıynsha júrgiziledi, dep habarlaıdy QazAqparat tilshisi.
«Elbasy tapsyrmasyna sáıkes «Qyzylorda-Jezqazǵan-Qaraǵandy-Temirtaý-Astana» baǵyty boıynsha aldymyzdaǵy jyly «Saryarqa» magıstraldyq gaz qubyryn iske asyrý jospary tur. Atalǵan gaz qubyry elimizdiń Ortalyq jáne Soltústik óńirlerin, onyń ishinde bas qalamyz Astanany da kógildir otynmen qamtamasyz etýge múmkindik beredi. Búginde jobanyń smetalyq qujattamasy ázirlenip, saraptamalyq oń qorytyndy alyndy. 2019 jyly qurylysy bastalatyn gaz qubyrynyń búginde qarjylandyrý kestesi men sharttary ázirlenip Úkimettiń tıisti sheshimderimen bekitildi», - dedi QR Energetıka vıtse-mınıstri Maǵzum Myrzaǵalıev OKQ-de ótken baspasóz máslıhatynda.
Energetıka vıtse-mınıstri joǵaryda atalǵan qalalardan bólek gaz qubyry ótetin trassanyń boıyndaǵy 171 eldi meken, onyń ishinde Astana qalasy mańy men Qaraǵandy oblysynyń 119 eldi mekeni jáne Aqmola oblysynyń 51 eldi mekeni tabıǵı gazben kezeń-kezeńimen qamtamasyz etiletinin aıtty. Sondaı-aq, joba qurylysy 1690 adamdy jumyspen qamtıdy dep kútilýde.
Sonymen qatar, vıtse-mınıstr elimizdegi gaz óndirýdiń kólemi men ony tutyný týraly málimettermen de bólisti.
«Osy jyldyń qorytyndysy boıynsha gaz óndirý kólemi 53,4 mlrd tekshe metrdi quraıdy, bul ótken jylmen salystyrǵanda 500 mln tekshe metrge artyq. Taýarlyq gaz óndirý kólemi 31,9 mlrd tekshe metr nemese 2017 jylmen salystyrǵanda 300 mln tekshe metrge ósken. Al gazdy tutyný kólemi 14,9 mlrd tekshe metr, bul aldyńǵy jylmen salystyrǵanda 1,1 mlrd tekshe metrge joǵary ekeni baıqalady», - dedi ol.
Onyń aıtýynsha, elimizde gaz tutyný deńgeıiniń qarqyndy ósýi baıqalady, búgingi tańda halyqty gazdandyrý deńgeıi 47,38% quraıdy nemese 8,5 mln turǵyn gazben qamtylǵan. Aǵymdaǵy jyly memleket tarapynan gazdandyrýǵa 18,4 mlrd teńge, al ulttyq operator tarapynan 1,5 mlrd teńge qarastyryldy. Ústimizdegi jyldyń qorytyndysy boıynsha kógildir otynǵa qol jetkizgen turǵyndar sany taǵy 129 myńǵa artady dep kútilýde, qazirgi tańda elimizdiń 17 óńiriniń 11-i tabıǵı gazben qamtylǵan.
«Energııa resýrstarynyń óńirlik tranzıtindegi Qazaqstannyń róli artyp keledi. Aǵymdaǵy jyly Qazaqstan-Qytaı gaz qubyrynyń eki stantsııasy paıdalanýǵa berildi. Nátıjesinde atalǵan transulttyq gaz qubyrynyń óndirý qabileti 5 mlrd tekshe metrge artyp, jylyna 55 mlrd tekshe metr gaz óndirýge qol jetkizildi. Odan bólek, 2017 jyldyń qazan aıynan bastap qazaqstandyq gaz Qytaı naryǵyna eksporttala bastady. Búginde osy baǵytta shamamen 6,1 mlrd tekshe metr gaz eksporttaldy. Kelesi jyldan bastap otandyq gazdy eksporttaý kólemin jylyna 10 mlrd tekshe metrge deıin ulǵaıtý týraly kelisimge qol qoıyldy», - dedi M.Myrzaǵalıev.
