«Saryarqa» qubyryn Reseı Federatsııasynyń gaz qubyrymen baılanystyrý nusqasy zerttelip jatyr - mınıstr

KÓKShETAÝ. QazAqparat - «Saryarqa» qubyryn Reseı Federatsııasynan gaz qubyrymen baılanystyrý nusqasy zerttelip jatyr. Bul týraly QR Energetıka mınıstri Almasadam Sátqalıev Stepnogor qalasynyń turǵyndary aldynda esep berý kezdesýinde málim etti, dep habarlaıdy QazAqparat tilshisi.

Kezdesýde mınıstr turǵyndardy uzaq merzimdi baǵa turaqtylyǵyn jáne baǵanyń alypsatarlyq ósýin boldyrmaýdy qamtamasyz ete otyryp, suıytylǵan munaı gazy naryǵyn reformalaý jónindegi sharalar týraly habardar etti.

«Qazaqstannyń soltústik jáne shyǵys óńirlerin gazdandyrý jónindegi QazaqGaz jobasyn iske asyrý sheńberinde bıylǵy jyldyń sońyna deıin aıaqtalý merzimimen «Beıneý-Bozoı-Shymkent» 2-shi jelisin jobalaý boıynsha jumystar bastaldy. Jobany 2026 jyldyń sońyna deıin iske asyrý josparlanýda», - dedi Almasadam Sátqalıev.

Sonymen birge, ol mınıstrlik «Saryarqa» qubyryn Reseı Federatsııasynan gaz qubyrymen baılanystyrý nusqasyn zerttep jatqanyn atap ótti.

«Aldyn ala tehnıkalyq-ekonomıkalyq negizdeme ázirleý aıaqtaý satysynda. Gaz qubyrynyń baǵyty men gaz baǵasyn alǵannan keıin eldiń soltústik jáne shyǵys óńirlerin gazdandyrýdyń ońtaıly nusqasy aıqyndalatyn bolady», - dep túıindedi mınıstr.