Saryarqa kóshpendiler oıynyna Qaraǵandy oblysynan 300-den astam sportshy qatysty

Birneshe kún boıy Nura aýdanynda kókpar, aýdaryspaq, sadaq atý, arqan tartý jáne basqa da birqatar sport túrleri boıynsha jarys ótti.

Kókparda eki lıgada 23 komanda ózara baq synasty. Birinshi lıgada «220 volt» (Buqar Jyraý aýdany) komandasy úzdik atandy.

Ekinshi oryndy Nura aýdanynyń «Rassvet» komandasynyń qatysýshylary jeńip aldy. Úzdik úshtikti «Іzendi Arlandary» atty Nura aýdanynyń komandasy túıindedi.

Joǵary lıgada Shet aýdanynyń «Aqsý-Aıýly» komandasynyń shabandozdary jeńiske jetti.

Ekinshi oryndy osy aýdannyń kókpar áýesqoılary – «Aqsý-Aıýly jastar» komandasy ıelendi.

Úshinshi oryn Qarqaraly aýdany Qaraǵaıly kentiniń «Janalı» komandasynyń shabandozdaryna buıyrdy.

«Kókpar óte keremet boldy. Joǵarǵy lıgada birinshi orynǵa ıe boldyq. Bizdiń komanda – oblystaǵy eń myqty komandalardyń biri. Biraq qarsylastar da laıyqty. Jalpy, sońǵy úsh jylda oblysta at sporty jaqsy damyp keledi. Úzdik úshtikte Shet, Buqar jyraý jáne Qarqaraly aýdandarynyń shabandozdary bar. Sondaı-aq aqtoǵaılyqtar arasynda da myqty komandalar bar. Maýsym aıynyń sońynda Aqtoǵaıda spartakıada ótedi. Soǵan daıyndalyp jatyrmyz», – dep atap ótti «Aqsý-Aıýly» komandasynyń qatysýshysy Dıdar Esmahaev.

Aýdaryspaqta baq synasqan sportshylardyń kúresi de keremet áserli boldy. Qatysýshylar ózderiniń kúshi men eptiligin úsh salmaq dárejesinde kórsetti: 62, 82 jáne 82+ keli.

Shet jáne Nura aýdandarynan Farhat Sovetov, Erǵanat Taıjanov jáne Azamat Jarken úzdik dep tanyldy.

Arqan tartý boıynsha bas júlde Nura aýdanynyń erler jáne áıelder komandalarynyń qorjynyna tústi.

Qoı kóterýde Qarqaraly aýdany Sarybel aýylynan Ádilet Serikpaev úzdik nátıje kórsetti. Ol eki mınýt ishinde 50 ret kóterdi.

Jarys kontserttik baǵdarlamamen súıemeldendi. Festıval qonaqtary men qatysýshylary úshin kıiz úıler tigildi.

Barlyq jeńimpazdar medaldarmen, kýboktarmen jáne demeýshiler usynǵan baǵaly syılyqtarmen marapattaldy.