«Saryarqa» gazy: Qaraǵandy oblysynda jumys qarqyny qandaı
Qaraǵandy oblysy ákimdiginen málim etkendeı, aımaq basshysy Erlan Qoshanov magıstraldaǵy jumys barysymen tanysty. Oblys ákimin qaraǵandylyqtardyń úılerine gaz qaı ýaqytta jetetini qyzyqtyrdy.
Onyń aıtýynsha, Jezqazǵanda gaz taratý jelileriniń qurylysy bastaldy. Al Qaraǵandy men Temirtaý jumystarǵa osy aptada kirisedi. Jańaarqa, Shet, Buqar jyraý, Osakarov aýdandarynda jáne Shahtınsk qalasynda jobalyq-smetalyq qujattama ázirlenýde.
Energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov habarlaǵandaı, Qaraǵandy men Temirtaýda gaz jeltoqsan aıynyń sońynda, Jezqazǵanda ol merzimnen bir aı buryn beriletin bolady.
Oblys ortalyǵynda birinshi kezeńde Badın jáne Olımpııskaıa kósheleri, Temirtaý qalasynda Saryarqa kóshesi gazdandyrylady. Jezqazǵanda jeke sektordan basqa kógildir otyn Talap aýyly men Stantsıonnyı kentiniń turǵyndaryna da beriledi.
«Barlyq jumystardy merziminde aıaqtaýǵa úlgerý kerek. Eger problemalar bolsa, tezdetińizder, sheshińizder. Sondaı-aq halyqpen jumys isteý qajet. Adamdarǵa gazdy qalaı qosýǵa bolatynyn túsindirińiz, bul qanshalyqty tıimdi ekenin túsindirińiz, olarǵa osy másele boıynsha kómek kórsetińizder», - dep tapsyrdy Erlan Qoshanov.
«Úı ıeleri gazben jylytýǵa qosylý rásimin jeńildetýdi qalaıdy. Sol sebepti, bıýrokratııalyq qaǵazbastylyqtardy boldyrmaý úshin barlyq jaǵdaı jasalady. Ázirge jylytý júıesine qajetti gaz tek jeke sektordyń turǵyndaryna qoljetimdi bolady. Ýaqyt óte kele kópqabatty úılerge de tartylmaq. Sheshimdi kondomınıýmǵa qatysýshylar men qyzmet kórsetýshilerdiń ózderi qabyldaıdy. Aldyn ala esepteý boıynsha, Qaraǵandy oblysynda bir tekshe metr gaz baǵasy 47 teńgeni quraıdy», - dedi oblys ákimdiginen.
Esterińizge sala keteıik, «Saryarqa» gaz qubyrynyń qurylysy 2018 jyldyń qarasha aıynda bastaldy. Eldi gazdandyrýdy Elbasy – Qazaqstannyń Tuńǵysh Prezıdenti Nursultan Nazarbaev tapsyrǵan bolatyn.
