«Saryarqa» gaz qubyrynyń alǵashqy shaqyrymy salyndy
«Saryarqa» gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan baǵyty boıynsha salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabıǵı gazben qamtasyz etýge múmkindik bar. Árıne, ınfraqurylymnyń salynýyna qaraı gaz tutynatyn adamdardyń sany artady. Ótken jyly tamyz aıynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aıynda «AstanaGaz QMG» AQ men merdiger kompanııa - «Qazqurylysqyzmet» AQ arasynda tıisti kelisimshartqa qol qoıyldy. Qazirgi kezde barlyq qajetti texnıka men mamandar tartyldy. Dánekerleý jumystary bastaldy. «Saryarqa» gaz qubyrynyń, shamamen, 1300 metri salyndy», - dedi M.Myrzaǵalıev QR Májilisinde ótken «dóńgelek ústelde».
Vıtse-mınıstrdiń aıtýynsha, búginde Qaraǵandy men Aqmola oblysynda, sondaı-aq, Nur-Sultan qalasynda gaz qubyryna qosylyp, shıkizatty xalyqqa taratý boıynsha daıyndyq jumystary bastaldy. Jalpy, aldaǵy úsh jylda aımaqtarda gaz ınfraqurylymyn damytýǵa qosymsha qarjy qarastyrylǵan. Budan bólek, 2030 jylǵa deıin respýblıkalyq bıýdjetten taǵy shamamen 157 mlrd teńge bólinedi.
«Osy aqsha Nur-Sultan qalasyn, Qaraǵandy, Batys Qazaqstan, Aqtóbe, Mańǵystaý men Aqmola oblystaryn gazdandyrýǵa jumsalady», - dep atap kórsetti M.Myrzaǵalıev.
