«Saryarqa» gaz qubyryn tóseý jumystary 100 paıyz aıaqtaldy

NUR-SULTAN. QazAqparat – «Saryarqa» magıstraldy gaz qubyrynyń jelilik bólikteri 100 paıyz tóselip, dánekerlendi. Bul týraly búgin Úkimet úıindegi baspasóz máslıhatynda QR Energetıka vıtse-mınıstri Murat Júrebekov aıtty, dep habarlaıdy QazAqparat tilshisi.

«Memleket basshysynyń saılaýaldy baǵdarlamasynda mınıstrlik aldyna qoıylǵan mindetterdiń biri – elordamyzdy, respýblıkanyń soltústik jáne ortalyq óńirlerin gazben jabdyqtaý úshin «Saryarqa» magıstraldy gaz qubyrynyń birinshi kezeńin ýaqytyly aıaqtaý. Gaz qubyrynyń bul ýchaskesi Nur-Sultan, Qaraǵandy, Temirtaý, Jezqazǵan qalalarynyń jáne gaz qubyry trassasy boıyna jaqyn eldi mekenderdiń turǵyndaryn tabıǵı gazben qamtamasyz etýge múmkindik beredi», - dedi ol.

Vıtse-mınıstrdiń atap ótýinshe, jobany iske asyrý úshin «AstanaGaz QMG» kompanııasy quryldy. Onyń aktsıonerleri – «Samruq-Qazyna» qory jáne «Báıterek» holdıngi.

«Ótken jyldyń tamyzynda Ekonomıkany jańǵyrtý jónindegi memlekettik komıssııa syzba men qarjylandyrý sharttaryn maquldady. Joba qurylysynyń jalpy quny 267,3 mlrd teńgeni quraıdy. Onyń ishinde 80,3 mlrd teńge «AstanaGaz KMG» jobalyq kompanııasynyń jarǵylyq kapıtalyn qurý joly arqyly, 85 mlrd teńge «BJZQ» AQ-nyń oblıgatsııalyq zaıymy, 102 mlrd teńge Eýrazııalyq damý banki men Qazaqstannyń damý bankiniń oblıgatsııalyq zaımy arqyly bólinedi. Bas merdiger retinde «QazQurylysServıs» komppanııasy aıqyndalǵan», - dedi ol.

Onyń atap ótýinshe, qazirgi ýaqytta «Saryarqa» magıstraldy gaz qubyrynyń Nur-Sultan qalasyna deıingi qurylysy aıaqtalýǵa jaqyn.

«Qurylys jumystaryna 1 700 maman men 1 myń arnaıy tehnıka jumyldyrylǵan. 1 061 shaqyrym qubyr nemese gaz qubyrynyń 100 paıyz jelilik bóligi tóselip, dánekerlendi. 963 shaqyrym nemese gaz qubyrynyń 91 paıyzy synaqtan ótkizildi», - dedi Murat Júrebekov.

Vıtse-mınıstrdiń sózine qaraǵanda, gaz qubyrynyń, tarmaqtarynyń, 5 avtomattandyrylǵan gaz taratý stansasynyń, gaz ólsheý stansasynyń jáne basqarý beketiniń qurylysy júrgizilip jatyr.

«Tolyqtaı alǵanda barlyq jumys kestege saı júrgizilýde jáne osy jyldyń jeltoqsan aıynda magıstraldy gaz qubyryn, 5 avtomattandyrylǵan gaz taratý stansasynyń, gaz ólsheý stansasynyń jáne basqarý beketin qamtıtyn barlyq nysandaǵy qurylys jumystary aıaqtalady. Gaz qubyryn paıdalanýǵa qabyldaý osy jyldyń 31 jeltoqsanyna josparlanǵan. Nur-Sultan qalasyna deıingi magıstraldy gaz qubyrynyń qurylysy gaz qubyry trassasynyń boıyndaǵy 171 eldi mekendi kezeń-kezeńmen kógildir otynmen qamtýǵa, elordanyń jáne ózge de eldi mekenderdiń ekologııalyq jaǵdaıyn jaqsartýǵa múmkindik beredi», - dedi vıtse-mınıstr.