«Saryarqa» gaz qubyry: Nur-Sultanda gaz Kóktaldan keıin qaı jaqqa tartylady
NUR-SULTAN. QazAqparat - Elordanyń otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov gaz taratý sharalary týraly aıtyp berdi, dep xabarlaıdy QazAqparat tilshisi.
Onyń aıtýynsha, gazdy aldymen jylý elektr stansalaryna tartý josparlanǵan. Sebebi búginde atalǵan nysandar ekologııaǵa úlken zııan keltirip otyr. Máselen, JES-1 ábden tozǵan. Sebebi sonaý 60-shy jyldary salynǵan. Sol jerde mazýt jaǵatyn qazandyqtardy ózgertip, tabıǵı gazdy jaǵý josparlanyp otyr. "Sosyn Kóktal-1 men Kóktal-2-ge tartylady. Sebebi ol jerde kómirdi kóp jaǵady. Odan keıin Ońtústik-Shyǵys aýdannyń sol jaq jáne oń jaǵy, ary qaraı Mıchýrıno, Qyzyljar, Óndiris jáne taǵy basqa eldi mekenderge tartylady. Budan bólek, Qorǵaljynǵa qaraı Ilınka men Úrker jaqqa ketedi", - dedi E.Tóleýov QR Parlament Májilisinde ótken "dóńgelek ústelde".
Basqarma basshysynyń sózine qaraǵanda, osy aıda qurylys-montajdaý jumystary bastalady. "Biz mınıstrlikpen únemi baılanys ustap otyramyz. Sebebi gaz qubyry kelgende taratý jelileri daıyn turýy qajet", - dep atap kórsetti E.Tóleýov.
Aıta keteıik, búgingi jıynda QR Energetıka vıtse-mınıstri Maǵzum Myrzaǵalıev "Saryarqa" gaz qubyrynyń qurylysy týraly aıtyp berdi.
"Saryarqa" gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan marshrýtymen salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabıǵı gazben qamtasyz etýge múmkindik bar. Árıne, ınfraqurylymnyń salynýyna qaraı gaz tutynatyn adamdardyń sany artady. Ótken jyly tamyz aıynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aıynda "Astana gaz" AQ men merdiger kompanııa - "Qazqurylysqyzmet" AQ arasynda tıisti kelisimshartqa qol qoıyldy. Qazirgi kezde barlyq qajetti texnıka men mamandar tartyldy. Dánekerleý jumystary bastaldy. "Saryarqa" gaz qubyrynyń, shamamen, 1300 metri salyndy", - deıdi M.Myrzaǵalıev.
