«Saryarqa» gaz qubyry: Qaraǵandy oblysyn gazdandyrý tejelip otyr
NUR-SULTAN. QazAqparat - Qaraǵandy oblystyq energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov aımaqty gazdandyrý sharalary týraly aıtyp berdi, dep xabarlaıdy QazAqparat tilshisi.
Onyń aıtýynsha, "Saryarqa" gaz qubyrynyń 80 protsenti Qaraǵandy oblysymen ótedi. Sonyń aıasynda alty qalaǵa - Qaraǵandy, Temirtaý, Jezqazǵan, Shaxtınsk, Saran men Abaıǵa gaz tartylady. Budan bólek, oblystyń 114 eldi mekenin tabıǵı gazben qamtamasyz etý kózdelip otyr.
"Búginde Jezqazǵan qalasyn gazdandyrý jobasy saraptamadan ótti. Oǵan 2,4 mıllıard teńge bólinedi. Qalada arnaıy gaz kesheni salynady. Ol arqyly shamamen 10 000 adamǵa gaz jetkiziledi. Búginde taǵy eki qalanyń jobasy saraptamada jatyr. Jalpy, Qaraǵandy oblysyn gazdandyrý jobasynyń quny - 250 mıllıard teńge. Búginde xalyqpen birge ArselorMıttal Temirtaý, Qazaqmys, Jáırem ken baıytý kombınaty sııaqty kompanııalar da gazdy kútip otyr. Olar ózderiniń óndiristik nysandaryn tabıǵı gazǵa kóshirýge ázir", - dedi U.Úsenov QR Parlament Májilisinde ótken "dóńgelek ústelde".
Basqarma basshysynyń sózine qaraǵanda, Qaraǵandy oblysyn gazdandyrýǵa kedergi jasap otyrǵan birqatar normatıvtik máseleler bar. Búginde respýblıka boıynsha gazdandyrý sharalaryn júrgizýdiń syzba-nusqasy bar. Onyń ishinde Qaraǵandy oblysy da kórsetilgen. "Alaıda memlekettik saraptama qyzmeti texnıkalyq-ekonomıkalyq negizdemeni talap etip otyr. Ol qujattyń qajeti shamaly. Biraq dál sonyń saldarynan Qaraǵandy oblysyn gazdandyrý sharalary tejelip otyr. Sebebi árbir eldi mekenge texnıkalyq-ekonomıkalyq negizdeme jasaý qajet. Al ol jumysqa bir jyl ketedi. Sosyn jobalyq-smetalyq qujattarǵa taǵy bir jyldaı kerek. Sóıtip, eki jyl ýaqyt tekke keteıin dep tur", - dep atap kórsetti U.Úsenov.
Aıta keteıik, búgingi jıynda QR Energetıka vıtse-mınıstri Maǵzum Myrzaǵalıev "Saryarqa" gaz qubyrynyń qurylysy týraly aıtyp berdi. "Saryarqa" gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan marshrýtymen salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabıǵı gazben qamtasyz etýge múmkindik bar. Árıne, ınfraqurylymnyń salynýyna qaraı gaz tutynatyn adamdardyń sany artady. Ótken jyly tamyz aıynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aıynda "Astana gaz" AQ men merdiger kompanııa - "Qazqurylysqyzmet" AQ arasynda tıisti kelisimshartqa qol qoıyldy. Qazirgi kezde barlyq qajetti texnıka men mamandar tartyldy. Dánekerleý jumystary bastaldy. "Saryarqa" gaz qubyrynyń, shamamen, 1300 metri salyndy", - deıdi M.Myrzaǵalıev.
Al elordanyń otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov Kótaldan keıin gazdyń qaı baǵytta tartylatynyn túsindirdi.
