«Saryarqa» gaz qubyry: 2 myńnan asa adam jumysqa tartyldy

NUR-SULTAN. QazAqparat -Halyq aldynda esep berip jatqan Energetıka mınıstri Qanat Bozymbaev elimizde gazdandyrý deńgeıi 49,7%-ǵa jetkenin aıtty, dep habarlaıdy QazAqparat tilshisi.

Onyń aıtýynsha, qazirdiń ózinde gazdy shamamen 9 mıllıon qazaqstandyq tutynyp otyr. Al elordany gazben qamtý jobasy josparǵa saı júrgizilýde.

«2019-2021 jyldarda oblysta 100-den astam joba iske asyrylatyn bolady. Al Saryarqa gaz qubyry kestege sáıkes salynyp jatyr. Qazirgi ýaqytta Jezqazǵan qalasyna jaqyn jerde dánekerleý jumystary júrgizilýde. Búgingi kúnge shamamen 420 km qubyr dánekerlendi. Bul jalpy gaz qubyrynyń 40%-yn quraıdy», - deıdi Qanat Bozymbaev.

Bas energetık elordamen birge, birinshi kezeńde Qaraǵandy, Temirtaý, Jezqazǵan, Sátbaev, Saran, Shahtınsk qalalarynyń 171 eldi mekeni gazben jabdyqtalatynyn jetkizdi.

«Atalmysh eldi mekenderdiń 142 myń turǵyny gazǵa qol jetkizedi. Jalpy jyl aıaǵyna deıin eldiń gazdandyrý deńgeıin 50 %-dan asyrý kútilýde», - dedi ol.

Mınıstrdiń máldimetinshe, Nur-Sultan qalasyna gaz tartý jumysyna 2200 adam tartylǵan.

«Qazirgi tańda dánekerleý jumystarynyń ortasha qarqyny kúnine 7-8 shaqyrym. Dánekerleý japsarlaryn tegisteý, oqshaýlaý, transheıalardaǵy qubyrlardy tóseý jáne kómý jumystaryna 2200 astam adam men 700 jýyq arnaıy tehnıka jumyldyrylǵan», - dedi Qanat Bozymbaev.