Saryarqa aýdanynyń ákimi mektep aýlalaryn aralap, abattandyrý jumystarymen tanysty

ASTANA. 26 tamyz. QazAqparat / - Búgin Astana qalasy Saryarqa aýdanynyń ákimi Sábıla Mustafına birqatar mektepterdiń aýlalaryn aralap, ondaǵy abattandyrý jumystarymen tanysyp shyqty. Bul týraly Astana qalasy ákimdiginiń baspasóz qyzmetinen habarlandy.

Keltirilgen málimetterge qaraǵanda, 2011 jyldyń alǵashqy jarty jyldyǵynda Saryarqa aýdanyndaǵy 6 mekteptiń aýlasyn abattandyrý kózdelse, bunyń 4-eýinde jumystar aıaqtaldy. Qalǵan eki nysan boıynsha abattandyrý sharalary jańa oqý jyly bastalǵanǵa deıin aıaqtalmaq. Bul rette mektep aýlalaryna qosymsha sporttyq alańdar salý da qamtylǵan. Aýdan aýmaǵyndaǵy 5 balabaqsha kúrdeli jóndeýden ótkizilse, bireýiniń jumysy áli de júrgizilip jatyr. Tıisti qarajattar tolyq qamtylǵan. 3 balabaqshanyń aýlasy qosymsha abattandyrylǵan.

Bunymen qosa, aǵymdaǵy jyl sońyna deıin Saryarqa aýdanyna qarasty 49 turǵyn úıdiń aýlasy abattandyrylatyn bolady. «Qalalyq máslıhattyń sheshimine oraı, mektep aýlalaryn abattandyrý aýdan ákimdikteriniń qaraýyna ótti. Buryn bul jumyspen bilim basqarmasy aınalysyp kelip edi. Soǵan oraı, aýdandaǵy 31 mekteptiń 6-ynda aýlany abattandyrý jumystary aıaqtalyp otyr. Aýlany kógaldandyrý, qorshaý jumystary oqýshylar úshin mańyzdy. Al joǵarydaǵy 6 mekteptiń abattandyrý jumystaryna 320 mln. bıýdjet qarajattary jumsaldy. Sonymen qatar, 31 mekteptiń birqatary abattandyrýdy qajet etpeıtin jańa standartpen salyndy. Sol úshin aldaǵy eki jyl barysynda biz 12 nysanda osyndaı jumystardy atqarýdy júzege asyratyn bolamyz», - dedi S. Mustafına.