Saryarqa aýdanynyń ákimdiginde ustazdarǵa syı-qurmet kórsetildi
ASTANA. 2 qazan. QazAqparat - Ustazdardyń kásibı merekesi qarsańynda Astana qalasy Saryarqa aýdany ákiminiń apparatynda saltanatty jıyn ótti. Basqosýda aýdan ákimi Ermaǵanbet Bólekpaev muǵalimderdi merekelerimen quttyqtap, elorda ákimi Imanǵalı Tasmaǵambetovtiń atynan 2 páter kiltin tapsyrdy, dep habarlady qalanyń resmı saıty.
Astana qalasy Saryarqa aýdanynyń ákimi Ermaǵanbet Bólekpaev: «Búgin mektep dırektorlarynyń barlyǵyn shaqyryp, syı-qurmet kórsettik. Sol dırektorlar arqyly aýdandaǵy muǵalimderdi de quttyqtadyq deýge bolady. Ol kisilerge densaýlyq, otbasyna qut-bereke tileımin. Jas urpaq tárbıelep jatqandary úshin alǵys aıtamyn», - dedi.
Jalpy, Saryarqa aýdanynda 37 mektep bar. Árqaısysynyń sanaly urpaq, ult maqtanyshy bolar azamat tárbıeleýde eńbegi zor. Dese de, sonyń ishinde kóshi ilgeri bilim mekemesine «Jyl kóshbasshysy» sertıfıkaty berildi.
«35 jyldan beri mektepte jumys istep, osyndaı dárejege jetkenime qýanyshtymyn. Astanada aıanbaı eńbek etip kelemin. Sol eńbegim joǵary baǵalandy.
Oqý jylynyń bastalǵanyna kóp ýaqyt bola qoımaǵanyn eskersek, áli ustazdar aldynda ıgi mamandyqtyń bedelin odan ári arttyryp, shákirtterin bilim nárimen sýsyndatyp, qanatyn qataıtý mindeti tur», - dedi páter kiltine ıe bolǵan №23 orta mekteptiń orys tili men ádebıeti pániniń muǵalimi Gúljan Álmuhambetova.
