Saryarqa aýdanynda zeınetkerlerge arnalǵan «Qazyna» ortalyǵy ashyldy
NUR-SULTAN. QazAqparat - Naýryz meıramy qarsańynda Nur-Sultanda «30 ıgi is» qaıyrymdylyq sharalary aıasynda Saryarqa aýdanynyń zeınetkerlerine arnalǵan «Qazyna» bos ýaqyt ótkizý ortalyǵy ashyldy, dep habarlaıdy qala ákimdiginiń resmı saıty.
Ortalyqta jattyǵý zalynda sportpen aınalysý úshin barlyq jaǵdaı jasalǵan. Sondaı-aq, kelýshiler bos ýaqytyn túrli ústel oıyndaryn oınap, ártúrli formattaǵy is-sharalardy uıymdastyra alady.
Ortalyqtyń ashylý saltanatynda elorda ákiminiń orynbasary Baqtııar Máken qatysýshylardy kele jatqan Naýryz merekesimen quttyqtap, qala ardagerlerine belsendi ómir saltyn saqtaýǵa barlyq jaǵdaı jasalatynyn atap ótti.
«Eki jyl buryn osyndaı ortalyqtardy ashý máselesin kóterdik. Ótken jyly qala ákimi Altaı Seıdirulynyń bastamasymen osyndaı 10 ortalyq ashý týraly sheshim qabyldandy. Ózderińiz biletindeı, mundaı ortalyq Esil aýdanynda da ashyldy. Sol kezde elordamyzdyń basqa aýdandarynda oıyn-saýyq ortalyqtaryn ashý týraly usynys qozǵaldy. Mine Naýryz merekesi qarsańynda Saryarqa aýdanynda ardagerlerge arnalǵan kezekti bos ýaqytyn tıimdi ótkizý ortalyǵyn ashyp otyrmyz. Sizderdi ortalyqtyń ashylýymen shyn júrekten quttyqtaımyn. Sondaı-aq, kele jatqan Naýryz merekesimen quttyqtap, zor densaýlyq, jumystaryńyzǵa tabys pen sáttilik tileımin!» - dedi elorda ákiminiń orynbasary Baqtııar Máken.
Іs-shara barysynda zeınetker Grıgorıı Shıshov osyndaı ortalyq ashqan qala basshylyǵyna alǵysyn bildirdi.
«80-ge qaraǵan shaǵymda elimizdiń ardagerlerine kórsetilip jatqan qamqorlyǵyn kórgenime qýanamyn. Ýaqytyly zeınetaqymyzdy da alyp jatyrmyz, jurttyń bizge kómektesýge degen yqylasyn da jıi baıqaımyz. Bizge sportpen shuǵyldanýǵa, qatarlastarymyzben bas qosýǵa jáne belsendi ómir súrýge yntalandyratyn keshen berildi. Bizge osyndaı úlken syılyq jasaǵan Eset Berikulyna erekshe alǵys aıtqym keledi. Endi bos ýaqytymyzda bas qosyp, shúıirkelesetin ornymyz bar. Barshańyzdy kele jatqan Naýryz merekesimen quttyqtaımyn!» - dedi zeınetker.
Aıta keteıik, búginde Saryarqa aýdanynda 25 myńnan astam zeınetker, onyń ishinde 7 soǵys ardageri, 1 240 eńbek ardageri bar. Olardyń bos ýaqytyn uıymdastyrý úshin aýdanda zeınetkerlerge arnalǵan 3 ortalyq jumys isteıdi.
