«Saryarqa» arqyly SQO-ǵa gaz tartýdyń tehnıkalyq-ekonomıkalyq negizdemesi jasalyp jatyr

NUR-SULTAN. QazAqparat – «Saryarqa» magıstraldyq gaz qubyry arqyly Soltústik Qazaqstan oblysyna gaz tartýdyń tehnıkalyq-ekonomıkalyq negizdemesi jasalyp jatyr, dep habarlaıdy QazAqparat tilshisi.

«Gazben jabdyqtaýdyń balamaly nusqasy – «Saryarqa» magıstraldyq gaz qubyrynan gaz jetkizý. Qazirgi tańda Aqmola jáne Soltústik Qazaqstan oblystaryn «Saryarqa» magıstraldyq gaz qubyry arqyly gazdandyrýdyń tehnıkalyq-ekonomıkalyq negizdemesine túzetý engizildi. Memlekettik saraptamany maýsym aıynda alamyz dep otyrmyz», - dedi Energetıka mınıstri Bolat Aqsholaqov Májiliste ótken Úkimet saǵatynda.

Bolat Aqsholaqovtyń sózine qaraǵanda, Shyǵys Qazaqstan oblysy men soltústik óńirlerdi gazdandyrýdyń ońtaıly nusqasy birneshe krıterııge negizdelmek. Olar:

- gazdandyrýdyń senimdiligi, turaqtylyǵy jáne tutynýshylar úshin gazdyń barynsha qolaıly baǵasy;

- resýrstyq bazanyń bolýy;

- áleýmettik-ekonomıkalyq áserge barynsha qol jetkizý;

- álemdegi ahýaldy eskere otyryp, energetıkalyq qaýipsizdikti qamtamasyz etý.

«Gazben jabdyqtaý obektileriniń negizgi bóligin jergilikti atqarýshy organdar bıýdjet qarajaty esebinen merdiger uıymdarmen shartqa qol qoıý arqyly salynady. Osydan keıin «QazaqGazǵa» odan ári paıdalaný úshin berilýi qajet», - dedi vedomstvo basshysy.

Buǵan deıin QR Energetıka mınıstrligi Reseıden gaz tartý úshin shekaralas oblystardyń qajettilikterin zerttep jatqandaryn habarlaǵan edi.