«Saryarqa - adaldyq alańy» jobalyq keńsesine 1000-nan astam ótinish tústi
QARAǴANDY. QazAqparat - «Saryarqa - adaldyq alańy» jobalyq keńsesine Qaraǵandy oblysynyń turǵyndarynan 1000-nan astam ótinish kelip tústi. Kóp jaǵdaıda ótinish berýshiler qujattaryn alýǵa jáne zańdy máselelerdi sheshýge kómektesýdi suraǵan, dep habarlaıdy QazAqparat tilshisi.
«Saryarqa - adaldyq alańy» jobalyq keńsesiniń jumysy týraly onyń basshysy Málıka Kúsenbaeva oblys ákimdiginde ótken apparattyq jınalysta baıandady.
«455 ótinish boıynsha sharalar qabyldandy. Máselen, Buqar Jyraý aýdanynda jergilikti ákimdiktiń kómegimen ótinish bergen turǵynǵa zeınetker kýáligin berý máselesi sheshildi. Qaraǵandy qalasynyń Oktıabr aýdanynda «Maıak» aıaldamasynda jyldamdyqty shekteıtin jol belgisi ornatyldy. Shet aýdanynda Jaryq aýylyndaǵy orta mektep qyzmetkeriniń jalaqy boıynsha quqyqtary qalpyna keltirildi. Sondaı-aq bizge Reseı azamatshasy QR aýmaǵynan tys jerlerge shyǵýǵa tyıym salýdy alyp tastaýǵa kómek kórsetý týraly ótinish bildirdi», - dedi ol.
Joba aıasynda oblysta mektepterde, kolledjderde, joǵary oqý oryndarynda jáne memlekettik mekemelerde 121 «adaldyq dúkeni» ashyldy. Qalalar men aýdan ákimdikterinde open space qaǵıdaty boıynsha front-keńseler men qabyldaý bólmeleri paıda boldy.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev «Sybaılas jemqorlyqtan azat aımaqtar» jobasyn jetildirý boıynsha Málıka Kúsenbaevanyń belsendi jumysyn baǵalady. Agenttik basshysynyń qoly qoıylǵan madaqtaý qaǵazyn búgin apparattyq keńeste oblys basshysy Erlan Qoshanov tabys etti.
2018 jyldyń qarasha aıynda Qaraǵandy oblysy «Sybaılas jemqorlyqqa qarsy aımaqtar» aktsııasy aıasynda jumys isteı bastady.
