Saryaǵashtyqtar úı irgesindegi baqshaǵa gúl egip, kól-kósir paıdaǵa kenelip otyr
Túrkistan oblysy Saryaǵash aýdanynda 80-ge jýyq otbasy gúl ósirýmen aınalysyp keledi.
Bir qyzyǵy, qys mezgilinde de bul kásip toqtamaıdy.
Sebebi, úıirgelik jerge jylyjaı soqqan turǵyndar jyl on eki aı boıy gúl ósirip, satylymǵa shyǵaryp otyr.
Derbisek aýylynyń turǵyndary da gúl ósiretin shaǵyn kásipke beıimdelgen.
Sonyń biri - Mahat Áýeshov. Ol jıyrma jyldan beri osy kásippen aınalysyp keledi.
Sharýa 20 sottyq jerindegi jylyjaı aýmaǵynan alǵan ónimderin satý arqyly otbasyn asyrap otyr.
Al aýlasynda raýshannan bastap alstromerııa, hrızantema syndy sheteldik surypty gúlder ósip tur.
«Gúl kóshetterin ósirýdiń ózindik qıyndyqtary bar. Egilgen gúldi ár 10-15 kún saıyn sýaryp turý kerek. Jylyjaıdaǵy qalypty temperatýra 10-15 gradýs bolýy shart. Al naýryz aıynyń basynan bastap sabaǵynan qyrqylǵan gúlder satylymǵa shyǵa bastaıdy. Mereke saıyn kórshiler men aǵaıyn-týysqa óz aýlamyzda ósken gúlderdi syıǵa tartamyz. Bul kez kelgen jannyń kóńiline erekshe qýanysh syılaıtyny anyq», - deıdi ol.
Kásipkerdiń gúlderine degen suranys ta joǵary. Ásirese Shymkent, Almaty, Nur-Sultan qalalarynan arnaıy tapsyrys berýshiler qatary qalyń.
Al, Naýryz merekesiniń qarsańynda tapsyrys kólemi ulǵaıyp, kóterme baǵamen alyp ketýshiler de kezdesedi.
Jalpy ótken jyly saryaǵashtyq sharýalar 600 myńǵa jýyq gúl ósirgen.
