Saryaǵashtyq sharýalar qaıta óńdeý isin jandandyra bastady
Búginde munda sút óndirýmen aınalysatyn birneshe sharýa qojalyǵy qaıta óńdeý salasyna mán berip otyr. Solardyń biri - Darbaza aýyldyq okrýginde ornalasqan «Fırma Saken» JShS-gi. Sút óndirýmen aınalysatyn seriktestiktiń negizi 2000 jyly qalanǵan. Saryaǵash aýdanyna jasaǵan jumys sapary barysynda oblys ákimi Janseıit Túımebaev seriktestiktiń qorajaıyn aralap kórip, jumysyna oń baǵa berdi.
« Saryaǵash aýdanynda jaıylym kemshin bolǵandyqtan mal basyn kóbeıtýge múmkindik az. Desek te, bul qıyndyqqa qaramastan qorasyn malǵa toltyryp, sút óndirý isine den qoıǵan sharýashylyqtyń qaıtap óńdeý isine dem berip otyrǵany qýantady. Osy rette aýdan basshylyǵy sharýalarǵa memleket tarapynan kórsetiletin barlyq jeńildikterdi der kezinde kórsetýi qajet», - dedi Janseıit Qanseıituly.
Búginde seriktestik qorasynda 2642 bas mal basy bar. Onyń 595-i iri qara bolsa, 2047-si ýaq mal. Qojalyq basshysy aldaǵy ýaqytta mal basyn kóbeıtip, sút ónim túrlerin kóptep óndirýge den qoımaqshy.
«Búginde seriktestik ıeliginde 1592 gektar jer bar. Jaıylym tarshylyǵy ázirge sezilip otyrǵan joq. Jýyrda biz zamanaýı sońǵy úlgidegi ozyq tehnologııalardy ornatýdyń arqasynda sút jáne sút ónimderin sapaly etip óndirýge qol jetkizip otyrmyz», - deıdi qojalyq tóraıymy Sharkúl Bagazıeva.
Ozyq tehnolgııany keńinen qoldana bastaǵan seriktestikte jylyna 720 tonna shamasynda sút ónimderin daıyndaıdy. Seriktestik búginde 20 adamdy turaqty jumyspen qamtyp otyr.
Oblys ákimi aralaǵan kórgen kelesi nysan - «Baza - Servis» JShS-niń 2,5 gektar aýmaqta ornalasqan aýylsharýashylyq ónimderin saqtaý qoımasy men kókónis ónimderin konservileý tsehy boldy. Jalpy quny 1 mlrd 200 mln teńgeniń quraıtyn qoımaǵa seriktestik 900 mln teńgeni jeke qarajaty esebinen shyǵarsa, 300 mln teńgeni nesıe alý negizinde júzege asyrypty. Qoımanyń syıymdylyǵy 10 myń tonnany quraıdy. Kásiporynnyń konservileý tsehy aıyna 60 myń shyny ydysqa ónim jabýǵa qaýqarly. Seriktestikte búginde 20 adam turaqty jumyspen qamtylǵan.
