Saryaǵashtyq polıtseıler keden beketiniń aýmaǵyn zańsyz saýda dúńgirshekterinen tazartty
SARYAǴASh. QazAqparat – Túrkistan oblysy, Saryaǵash aýdanynda zańsyz qoıylǵan saýda dúńgirshekterdi joıý maqsatynda reıdtik sharaǵa uıymdastyryldy. Tártip saqshylary esh ruqsatsyz salynyp, saýda jasap turǵan oryndardy retke keltirdi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, polıtseıler Jibek joly aýylynda ornalasqan «Jibek joly» keden beketiniń aldyn jabaıy saýdadan arashalady. Óz betinshe belgilenbegen jerge plastıkalyq ramadan jasalǵan dúńgirshekterin qoıyp, zańsyz aqsha aıyrbastaý pýnkterin ashyp alǵan tulǵalardy tártipke shaqyrdy. Olarǵa zańsyz aqsha aıyrbastaýǵa bolmaıtyndyǵyn túsindirip, arnaıy tehnıkanyń kómegimen atalǵan dúńgirshekter oryndarynan alyndy.
«Tekseris barysynda Saryaǵash APB JPQ ÝPI-men 5 azamatshaǵa QR Ákimshilik quqyq buzýshylyq týraly kodeksiniń 505-baby «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalarmen eldi mekender ınfraqurylymy obektilerin buzý, jasyl ekpelerin joıý jáne búldirý» boıynsha eskertý jasaldy. Oǵan qosa, osy zańsyzdyq qaıta jasalǵan jaǵdaıda 20AEK (50500 teńge) kóleminde ákimshilik aıyppul salynatyndyǵy týraly túsindirme jumystary júrgizildi. Polıtseıler jeke kásipkerlerge tek arnaıy belgilengen oryndarda ǵana saýda jasaýǵa, dúńgirshek ornatýǵa keńes beredi», delingen habarlamada.
