Saryaǵashtyq kásipker piste satyp alamyn dep 57 mln teńgege aldanyp qalǵan
SARYAǴASh. QazAqparat - Túrkistan oblysy Saryaǵash aýdanynyń kásipkeri piste satyp alamyn dep 57 mln teńgege aldanyp qalǵan. Ol Nur-Sultan qalasynyń turǵynyna qomaqty aqshany salyp jiberip, keıin qaıtaryp ala almaǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, ótken jyldyń qarasha aıynda Saryaǵash aýdanynyń turǵyny polıtsııaǵa aryzdanǵan.
Shaǵyn kásipkerlikpen aınalysatyn ol Nur-Sultan qalasynda piste ónimin arzan baǵada satatyn adam baryn estip, oǵan 500 tonna pistege tapsyrys bergenin jetkizgen.
Sóıtip telefonmen tildesken satýshynyń esepshotyna 57 mıllıon teńgeden astam aqshasyn aýdaryp jibergen.
Alaıda aradan 20 shaqty kún ótse de, piste ónimin almaǵan. Ne bolmasa aqshasyn qaıtarmaǵan.
Asa iri mólsherdegi alaıaqtyq qylmysyn ashýǵa oblystyq tergeý basqarmasynyń qyzmetkerleri men aýdandyq polıtsııanyń jedel-tergeý toby jumyldyrylǵan.
Tártip saqshylary qajetti is-sharalardy júzege asyryp, alaıaqtyq jasaǵan jas jigitti 3 táýlik ishinde Nur-Sultan qalasynan ustaǵan.
Ony Saryaǵash APB-ne jetkizip, kúdikti óz kinásin tolyǵymen moıyndaǵan.
Osy is boıynsha naqty dálelder sotqa joldanyp, oǵan qatysty úkim shyqqan.
Tergeý barysynda kúdiktiniń úlken kólemdegi qarajatty kórip, oıy ózgerip, jeńil jolmen aqsha tapqysy kelgeni belgili bolǵan.
Sondaı-aq, jábirlenýshiniń aqshasyn óz qajetine jumsap jibergen. Onyń úıin tintý kezinde tek 20 mıllıon teńge aqsha tabylǵan.
Qalǵan aqshaǵa «ShevroletMalibu», «ChevroletTracker» markaly jeńil avtokólikterin jáne sońǵy úlgidegi «iPhone 11 Pro», «Samsung» markaly uıaly telefondar satyp alǵany anyqtalǵan.
Aqshanyń qalǵan bóligin tanystaryna qaryzǵa bergen bolyp shyqty.
Saryaǵash aýdandyq soty 24 jastaǵy kúdikti jigitti QR QK 190-babymen kináli dep tanyp, 4 (tórt) jylǵa bas bostandyǵyn shekteý jazasyn taǵaıyndaǵan.
Sebebi, jábirlenýshi tarap sotta aıyptalýshyǵa keshirim bergen.
