Saryaǵashtyq dárigerler jyljymaly medıtsınalyq keshenmen qyzmet kórsetedi
SARYAǴASh. QazAqparat – Túrkistan oblysyna qarasty Saryaǵash aýdanynyń dárigerleri endi eldi mekenderdi aralap júrip, naýqastarǵa qyzmet kórsetetin boldy. Aýdandyq aýrýhanaǵa jyljymaly dıagnostıkalyq medıtsınalyq keshen kóligi syıǵa tartyldy, dep habarlaıdy QazAqparat tilshisi.
Shekaraly aýdandaǵy medıtsına qyzmetkerleri ortalyq aýrýhanaǵa kelýge múmkindigi joq shalǵaıda ornalasqan eldi mekenderde turatyn naýqastarǵa ózderi baryp, syrqattaryn anyqtaıtyn bolady.
«Bul keshen aýrýdy der kezinde dálme-dál anyqtaýǵa múmkindik beretin sońǵy úlgidegi medıtsınalyq apparattarmen jabdyqtalǵan. Zamanaýı quraldarmen jumys isteıtin arnaıy mamandarymyz da bar. Bir sózben aıtqanda muny halyqtyń densaýlyǵyn qorǵaý úshin jasalyp jatqan mol múmkindik deýge bolady», – deıdi aýdandyq ortalyq aýrýhanasy bas dárigeriniń orynbasary Baýyrjan Esboluly.
Sala mamandary aýdandaǵy koronavırýs indetiniń ekinshi tolqynyna daıyndyqtaryn kúsheıtip jatqanyn da jetkizdi. Olardyń aıtýynsha, aýrýhanaǵa ortalyqtandyrylǵan ottegi stantsııasy ornatylǵan. 18 ókpeni jasandy jeldetý apparaty alynǵan. Sondaı-aq, qosymsha 246 pýlsoksımetr men 150 kontaktisiz teplovızormen qamtylǵan. Sonymen qatar, demeýshilerdiń qoldaýymen 35 ottegi kontsentratory men 60 dana ottegi balony, 1 EKG apparaty men 20 tonometr jetkizilgen. Aýrýhanada 2 aıǵa jetetin dári-dármek qory jasaqtalǵan.
Aıta keteıik, qazir Ózbekstannan kelgen sheteldikter atalǵan aýrýhanada karantındik tekserý sharalarynan ótkizilýde. Olardyń arasynan koronovırýs juqtyrǵandary anyqtalǵan bolatyn. Aýrýhanada pnevmonııamen aýyryp jatqandar da em qabyldaýda.
