Saryaǵashtaǵy jylyjaı 4200 tonna ónim beredi
TÚRKІSTAN. QazAqparat - Túrkistan oblysy Saryaǵash aýdanynda jylyna 4200 tonna ónim beretin iri jylyjaıdyń jumysy qarqyndy. Bul týraly QazAqparat ákimdiktiń baspasóz qyzmetine silteme jasap habarlaıdy.
Jobanyń jalpy quny 1,8 mlrd teńge. Zamanaýı tehnologııamen jumys isteıtin jylyjaıda qyzanaq pen baklajan óndirilýde. 2009 jyly negizi qalanǵan «Jabaı ata» sharýa qojalyǵynyń tynys tirshiligimen jýrnalıster oblys ákiminiń baspasóz qyzmeti uıymdastyrǵan press-týr barysynda tanysty.
Qojalyq tóraǵasy isiniń oıdaǵydaı ilgerileýin kásipkerlikti qoldaýǵa baǵyttalǵan memlekettik baǵdarlamalarmen baılanystyrady.
«Jalpy jer kólemi 30 gektar bolsa, 28 gektaryna jylyjaı salynǵan. Onyń 24 gektaryna qyzanaq, 4 gektaryna baklajan egilgen. Jalpy alǵanda 840 myń túp kóshet otyrǵyzyldy. Munda tamshylatyp sýarý ádisi qoldanylady. Tehnologııa boıynsha sapaly ónim alý úshin tıisti jaǵdaıdyń bári jasalǵan. Demek, egilgen árbir túpten 4-5 keli ónim alýdamyz. Bastysy bizdiń taýarǵa degen suranys joǵary. Bir sózben aıtqanda josparymyz oıdaǵydaı júzege asyp keledi», - dedi Ergesh Tórebekov.
Jylyjaıda 80 adam jumys isteıdi. Daıyn ónim óńirimizden bólek, Astana, Almaty qalalary jáne soltústik oblystarǵa jóneltilýde. Taýardyń 50 paıyzǵa jýyǵy Reseıge eksporttalady.
Sondaı-aq, tilshiler Saryaǵash qalasynyń Ortalyq saıabaǵynda bolyp, ondaǵy atqarylyp jatqan sharýalarmen de tanysty. Jalpy 5,6 gektar aýmaqty alyp jatqan saıabaqta qala turǵyndary men qonaqtarynyń serýendep, ýaqyttaryn qyzyqty ótkizý úshin tıisti jaǵdaı jasalǵan.
Qoǵamdyq oryn jeke kásipkerge 10 jylǵa ınvestıtsııalyq jolmen jalǵa berilip otyr. Isabek Túktibaev óz qarajaty esebinen 115 mln teńge qarjy jumsap, saıabaqty oıyn - saýyq ortalyǵyna aınaldyrýdy josparlaǵan.
Joba júzege assa bir mezette 550 balaǵa deıin qabyldaıtyn ortalyqqa aınalatyn bolady. Qazirdiń ózinde onda túrli 18 oıyn attraktsıondary ornatylǵan. Bıyl qosymsha 7 oıyn alańsha iske qosylatyn bolady. Sondaı-aq, kógaldandyrý jumystary da nazardan tys qalmaq emes.
