Saryaǵashtaǵy keden beketterinde shetel azamattarynyń jalǵan kartochkalardy paıdalaný derekteri kóbeıgen – Prokýratýra
TÚRKІSTAN. QazAqparat – Túrkistan oblysy Saryaǵash aýdanyndaǵy keden beketterinde shetel azamattarynyń jalǵan kartochkalardy paıdalaný derekteri kóbeıgen. Bul týraly óńirdiń prokýratýra qyzmetkerleri kezekti Úılestirý keńesinde málim etti, dep habarlaıdy QazAqparat tilshisi.
Qadaǵalaý organdary ókilderiniń aıtýynsha, shekara qyzmeti jalǵan kartochkalardy paıdalaný derekterine qatysty 2018 jyly – 62, 2019 jyly – 249 faktini tirkegen. Sondaı-aq, shekaradaǵy beketterden ótip jatqan júk kólikterin tekserý jumystary sapasyz júrgiziledi. Ondaǵy avtoturaqtardyń jaǵdaıy da syn kótermeıdi. Tıptik túrde salynbaǵan jáne antısanıtarııalyq jaǵdaılardaǵy avtostantsııalarda tıisti ruqsaty joq. Tehnıkalyq talaptarǵa sáıkes kelmeıtin kólik quraldary kúndelikti jolaýshylardy tasymaldaýda. «Atameken», «Qaplanbek», «Qazyǵurt» pen «Qonysbaev» keden beketterindegi retsiz saýda oryndary jáne aqsha aıyrbastaý pýnkteri áli kúnge deıin zań talaptaryna sáıkestendirilmegen.
Jyl boıy osy jáne basqa da máselelerge jaýapsyzdyqpen qaraǵan quzyrly organdardyń laýazymdy tulǵalarynyń esepteri men jaýaptary tyńdalyp, olarǵa berilgen tapsyrmalardy oryndaý týrasynda qatań nusqaýlar jasalǵan. Atalǵan kemshilikterdi retke keltirý maqsatynda oblys prokýrory óz mindetterin talapqa saı oryndamaǵan laýazym ıeleriniń jaýaptylyǵyn qatań túrde qaraýdy usynyp, keden mańynda qalyptasqan problemalyq jumystardy qaıta qaraýdy tapsyrdy.
