Saryaǵashta jylyna 6 mln kóshet óndiretin kásiporyn bar
TÚRKІSTAN. QazAqparat - Túrkistan oblysy Saryaǵash aýdany Jibek joly aýyldyq okrýgindegi «Agro Tur» sharýa qojalyǵy 1 gektar jylyjaıda erte kóktemgi daqyldardyń kóshetterin daıyndaýmen aınalysady, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, munda kóshet túrleri men sanyna shekteý joq. ıAǵnı, jylyna 5-6 mln túp kóshet óndirýge qaýqarly. Jobanyń quny – 280 mln teńgeni quraıdy. Mundaǵy barlyq qural-jabdyqtar Túrkııadan ákelingen. Qojalyq ıesi Tursyn Tasqojaev túrik áriptesterimen kelisimshartqa otyryp, osy bir aýqymdy jobany iske asyrýda.
Bir aıta keterligi, mundaǵy kóshet egý, ósirý, kútip-baptaý, sýarý sekildi jumystyń barlyǵy kompıýterlengen. Kásiporyn búginge deıin 2 mln túp kóshet túrlerin ósirip, saýdalap úlgeripti.
«Bizdiń jylyjaıymyz sońǵy úlgidegi zamanaýı qural-jabdyqtarmen jabdyqtalǵan. Sondyqtan múmkindikterimiz de orasan. Bir mezette birneshe túp kóshetti ósirýge tapsyrys ala alamyz. Qazirgi tańda biz Shymkent qalasy men Túrkistan oblysynyń birqatar aýdandarynyń sharýalarynan tapsyrys alyp, tolyq oryndap berdik. Aldaǵy ýaqytta Qazaqstannyń barlyq oblys, qalalarynan da tapsyrys alýdy josparlap otyrmyz», – deıdi qojalyq tóraǵasy.
Túrkııalyq maman Nıhat Ergýnniń osynda júrgenine 6 aı bolypty. Ol osyndaǵy jergilikti mamandarǵa jylyjaıdyń qyr-syryn úıretýde. Túrkııalyq maman Saryaǵash óńiriniń klımaty kez kelgen jylyjaı túrin ornalastyryp, kókónistiń barlyq túrin otyrǵyzýǵa qolaıly ekenin aıtady. Aldaǵy bir-eki jylda 1 gektar kóshet jylyjaıynyń tapsyrys oryndaý qabileti 8-9 mln túp kóshetke deıin ulǵaıýy múmkin. Ol úshin elimizdiń túkpir-túkpirinen tapsyrystar kóptep qabyldanýy tıis.
