Saryaǵashta júkti áıel «járdemaqy alyp beremin» dep 18 adamdy aldap soqqan
SARYAǴASh. QazAqparat – Túrkistan oblysy Saryaǵash aýdanynda polıtseıler 18 adamnyń aqshasyn jymqyrǵan alaıaqty ustady. Buryn sottalǵan áıel «memleketten áleýmettik kómek alyp beremin» dep turǵyndardy aldap soqqan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, alaıaq áıeldi ustaýǵa jergilikti turǵyndardyń aryzy negiz bolǵan.
Polıtsııaǵa kelgen jas qyz ózine jaqsy tanys emes áıeldiń «memleket tarapynan beriletin aı saıynǵy áleýmettik kómekti alyp beremin» dep sendirip, oǵan 30 myń teńgesin bergenin aıtqan.
Kúdiktini izestirgen tártip saqshylary ony qolǵa túsirgen. Kúdiktiniń buǵan deıin de adamdardy «kólik júrgizý kýáligin alyp beremin» dep aldap, san soqtyryp ketkeni anyqtalǵan.
«Tergeý barysynda kúdiktiniń budan bólek osyndaı 17 jaıtqa qatysy bary anyqtaldy. Jalpy jábirlenýshilerge keltirilgen shyǵyn kólemi 800 myń teńgege jýyqtaǵan. Kúdikti óz kinásin tolyq moıyndap, qazirgi tańda sotqa deıingi tergeý júrip jatyr. Áıeldiń kishkentaı 2 balasy bar jáne júkti. Osyǵan baılanysty ol qolhatpen bosatyldy» delingen habarlamada.
