Saryaǵashta joǵalyp ketken 13 jasar qyz meshitten tabyldy
SARYAǴASh. QazAqparat - Túrkistan oblysynyń polıtseıleri úıinen shyǵyp ketip, iz-túzsiz joǵalǵan 13 jasar qyzdy tapty, dep habarlaıdy QazAqparat oblystyq polıtsııa departamentine silteme jasap.
Saryaǵash APB-ne túngi saǵat 23:00 shamasynda jergilikti turǵyn aryzdanyp kelgen. Áıel óz aryzynda keshki saǵat 17:30 shamasynda qyzy úıinen shyǵyp ketip, sodan habarsyz ketkenin kórsetken.
Jasóspirimniń anasy óz betinshe izdeýden esh nátıje shyqpaǵan soń, polıtsııa qyzmetkerlerinen kómek suraǵan.
Polıtseıler aqparat alysymen birden izdestirý jumystaryna kiristi. Kórgen-bilgenderden jaýap alyp, halyq kóp shoǵyrlanǵan aımaqtarda surastyrý jumysy júrgizildi.
TO PD aýdandyq, qalalyq polıtsııa bólim, basqarmalaryna baǵytnamalar jiberildi. Tártip saqshylary joǵalǵan qyzdy tez arada tabý maqsatynda taksı júrgizýshilerinen, bilýi múmkin degen dostarynan surastyrdy.
Sonyń nátıjesinde táýlik ishinde qyzdyń júrgen jeri anyqtalyp, ol ortalyq meshittiń janynan tabyldy.
Tekserý barysynda aǵasymen renjisip qalǵan qyz úıinen shyǵyp ketip, meshitte túnegeni belgili boldy. Qazirgi tańda jasóspirim qyz anasyna aman-esen tabystaldy.
«Qyzym belgisiz sebeppen úıden shyǵyp ketken bolatyn. Ózim izdestirip taba almaǵan soń polıtsııa qyzmetkelerinen kómek suradym. Saryaǵashtyq polıtseıler jedel izdestirip, qyzymdy taýyp berdi. Polıtseılerge alǵysym sheksiz» dep qyzdyń anasy polıtseılerge rızashylyǵyn bildirdi.
Túrkistan oblysynyń polıtseıleri barlyq ata-analarǵa balalaryna úıden úlkenderdiń ruqsatynsyz shyqpaý kerektigin únemi eskertip, olardy baqylaýda ustaýǵa keńes beredi.
Sonymen qatar jasóspirimderdiń ótpeli kezeńinde olarmen dos retinde sóılesýge shaqyrady.
