Saryaǵashta joǵalǵan 11 jasar bala Shymkentten tabyldy
Oblystyq PD baspasóz qyzmetiniń málimetinshe, aýyl turǵyny balasynyń iz-túzsiz joǵalǵanyn aıtyp polıtsııaǵa aryzdanǵan. Úıinen belgisiz baǵytqa shyǵyp ketkenine bir aptaǵa jýyqtaǵanyn jetkizgen. Áıel alty kún boıy ózi izdep taba almaǵan soń polıtsııaǵa júgingen. Aıtýynsha, bala 2 kúnnen soń habarlasyp, týysynyń úıinde ekenin aıtqan. Alaıda keıinnen anasy qaıta qońyraý shalǵanda týystary onyń kelmegenin jetkizgen. Sonymen qatar, balanyń anasy perzentiniń buǵan deıin de birneshe ret eshkimge aıtpastan úıinen ketip qalǵanyn aıtady. Óıtkeni, balanyń ákesi áıelimen ajyrasyp, otbasynan bólek turady. Sondyqtan bala ony izdep jıi jolǵa shyǵyp ketetin bolǵan.
Jasóspirimdi izdeýge Saryaǵash APB búkil jeke quramy, jergilikti polıtsııa qyzmeti ıývenaldy polıtsııa tobynyń ınspektorlary men jedel ýákilder jumyldyryldy. Tártip saqshylary jan-jaqqa bólinip, aýdannyń búkil aýmaǵyn qarap shyqqan. Balanyń týǵan-týystarynyń úıine baryp, izdeý jumystaryn kúsheıtedi. Jasóspirimniń ákesiniń anasynan bólek turatynyn jáne Shymkent qalasynyń jergilikti turǵyny ekenin anyqtaǵan polıtseıler sol jaqtaǵy izdeý jumystaryn da qolǵa alady. Osyndaı jumystyń nátıjesinde 11 jasar bala Shymkenttegi áýejaıdyń aıaldamasynan tabyldy. Teksere kele balanyń bir apta boıy ákesiniń alys týystarynyń úıinde júrgeni anyqtaldy.
«Tártip saqshylary balany polıtsııa bólimine jetkizip, arnaıy psıholog mamandardyń kómegimen túsindirý jumystaryn júrgizdi. Sodan keıin ony anasyna tabystady. Qazirgi ýaqytta joǵalǵan balany tapqan Saryaǵash APB JPQ ıÝvenaldy polıtsııa tobynyń ınspektory, polıtsııa kapıtany Serik Darhanov pen Krımınaldyq polıtsııa bólimshesiniń jedel ýákili, polıtsııa leıtenanty Maıra Elemesovaǵa jetkinshektiń anasy alǵys aıtty» delingen habarlamada.